Un gobierno di coalicion cu a priminti solucion, cu a priminti transparencia, cu a priminti di por miho pa pueblo, a presenta un presupuesto 2018 cu realmente ta totalmente contra interes di pueblo pero na fabor di partidonan den coalicion y nan amigo y sponsornan.
No solamente gobierno di coalicion no tabata prepara pa goberna, gabinete Wever Croes no tin intencion di sirbi interes di pueblo, sigur ora cu tuma nota cu aumento di BBO y BAZV ta drenta na vigor dentro di dos luna, esta dia prome di juli proximo.
Lider di fraccion di AVP den Parlamento, sr Marlon Sneek a mustra cu den e presupuesto cu gobierno a entrega na Parlamento no por mira ningun caminda cu a haci e minimo esfuerso pa reduci gastonan di gobierno, al contrario Raad van Advies a cuestiona e hecho cu gobierno a aumenta su personal cu mas di 100 cupo extra y tur esaki mientras cu a manda cerca di 300 hende cas cu nan ta bisa tabata liga cu gobierno anterior.
Esaki ta nifica cu despues di a manda e grup di 300 persona cas, gobierno a tuma den servicio 400 hende adicional na diferente departamento of den ministerionan, aumentando asina e gasto di personal.
Esaki ta mesun gobierno cu siendo den oposicion a grita tur dia cu nan lo reduci gasto di personal cu mas di 50 miyon florin y a sclama cu nan lo tin transparencia mientras cu esaki no ta ni visibel of notabel den e presupuesto cu a wordo presenta.
Es mas, ora cu analisa e presupuesto den su totalidad, por deduci mescos cu Raad van Advies tambe a señala cu e presupuesto aki ta manera e wega di “cak’i sconde” caminda ta kita aki pero ta pone aya y kisas sperando cu ningun hende lo ripara, sr Sneek a sigui mustra.
Pa sostene e maniobra di pirata aki gobierno ta haci uzo di su grupo di ‘marketing’ cu ta miembro d e fraccionnan den Parlamento, kendenan na luga di analisa e presupuesto y haci pregunta serio na gobierno, tin un siman caba elogiando e presupuesto den un forma cu gobierno mes no ta haciendo.
Parlamentario Marlon Sneek a sigui declara cu Minister di Finansa a declara cu e aumento di personal lo tin di haber den e departamentonan uniforma manera Polis, Duanero y otro servicionan pero den e presupuesto e departamentonan aki a mira nan presupuesto wordo reduci grandemente, sigur esun di polis cu lo haya 4.2 miyon menos pa overtime loke por nifica cu casonan criminal lo tarda mucho mas pa wordo atendi y soluciona.
Placa pa haya mas polis tambe a wordo reduci pues e plan di busca mas polis pa pone nan riba caya pa percura pa trankilidad, tampoco lo por wordo realisa pero sin tin placa pa 7 minister bira 8 minister mas un ‘staatssecretaris’ cu ta trahando como minister y cantidad di consehero kendenan ta conseha gobierno riba cantidad di asunto.
Ta algo serio ora cu Raad van Advies manda bisa gobierno cu e presupuesto presenta no ta cuadra cu leynan existente sigur di un gobierno cu a papia di integridad, di transparencia y awor ta haci net lo contrario.
A biaha pa Hulanda, a papia cu gobierno Hulandes a elogia e trabou di e actual gobierno pero atrobe ta loke e ministernan di gabinete Wever Croes mes ta gaba ya cu for di Hulanda mes nada a wordo confirma of anuncia.
Sinembargo ta mesun hendenan cu durante di campaña a priminti pueblo asina hopi cos, solucion pa finansa di Aruba den 100 dia, baha cantidad di minister na 7, soluciona criminalidad dor di pone 200 polis riba caya den prome 100 dianan di gobernacion cu a resulta den un grupo di polis cu a wordo atendi pa gabinete Mike Eman II ya cu e gobierno aki a dicidi di no pone suficiente placa pa mas polis y a dicidi di baha tambe e overtime di cuerpo policial.
Diferente ministerio cu lo ricibi miyones di florin sin un solo caminda ta wordo informa pa kico e placa aki ta destina y asina por mira cantidad di otro asuntonan cu ta laga incertidumbre grandi de e presupuesto 2018, lider di fraccion di AVP, Marlon Sneek a mustra.
