E concepto di presupuesto di pais Aruba pa 2018 cu a wordo entrega na Parlamento ta confirma e preocupacion grandi cu fraccion di AVP tin relaciona cu maneho financiero pa e añanan venidero, asina Sr. Richard Arends, parlamentario pa fraccion di AVP a declara. “Nos a constata un presupuesto caminda e gastonan di operacion di gobierno a subi cu 10 miyon y cu ta premira pa sigui subi durante e proximo cuater aña, segun e cuadro financiero presenta den e Financieel Economisch Memorandum, FEM.” E presupuesto ta mustra un aumento den cantidad di personal cu 100 persona entre januari y februari 2018 y esaki lo sigui aumenta den e periodo nos dilanti segun e maneho financiero cu gobierno a presenta. Inversionnan tambe a conoce un aumento substancial di 55 miyon florin sin un splicacion detaya riba e destino di e inversionnan aki tampoco e tipo di inversion esakinan ta, sea cu ta inversion fisico of inyeccion den capital.
Oponentenan politico a critica gabinete Mike Eman II di a logra e metanan den añanan 2015 y 2016 cu entradanan incidental y no di un manera, segun nan, structural. Ironia di bida ta mustra cu e norma cu a wordo stipula pa presupuesto 2018 ta wordo logra cu entradanan di mesun caracter incidental, entre otro, dor di dividendonan adicional di companianan estatal y reservanan di Aruba Tourism Authority. “Finansas publico ta un materia compleho. Logra e metanan poni bo dilanti ta rekeri hopi esfuerso di hopi actor. Si bo ta desea di duna un aire negativo na hecho cu entredanan ta ‘incidental’ bo mester ta sincero y trece esaki dilanti tambe. P’esey mi ta boga pa hiba un discusion obhetivo riba finansas publico enbes di tira cu ponencianan,” Sr. Arends a declara.
Na momento cu bo aumenta BAZV, e contribucion di gobierno nan e fondo di AZV ta reduci. “Mientras nos ta mira cu e landsbijdrage a baha, nos no a wak’e traduci den un reduccion di deficit. E espacio den presupuesto cu a wordo crea door di e reduccion di e Landsbijdrage ta wordo yena dor di maneho nobo,” e parlamentario pa fraccion di AVP den Parlamento a splika. E resultado cu nos tin nos dilanti ta un presupuesto caminda e entradanan ta 150 miyon florin menos cu e gastonan, cu compara cu nos economia ta igual na un deficit di 3% di GDP. Mester menciona cu e norma aki no ta e norma stipula pa aña 2018 segun e ley di supervision financiero. “E norma di 3% a wordo alcansa caba entre añanan 2015 y 2016. Cu e presupuesto aki – y esunan cu lo sigui segun e cuadro financiero den e FEM – Gobierno ta opta pa sigui aumenta e debe mientras cu na aña 2018 e debe mester a baha.”
Pa por financia e maneho nobo aki, gobierno a anuncia e ‘crisisheffing’ di 1% pa BAZV y 1.5% pa BBO cu lo mester drenta na vigor dia 1 juli venidero cu ta trece rond di 150 miyon di florin aden anualmente. Tambe ta aumenta accijnzen cu 10 cen cu ta ekivalente na 10 miyon di florin pa caha di gobierno. “Si bo ta mara na un norma di 0.5% di surplus pa e aña introduccion di cuakier belasting nobo lo tabata defendible. Sinembargo Gobierno ta introduci un crisisheffing pa djies yega na e norma cu nos a yega tres aña pasa caba.
No por yega na otro conclusion otro cu e “crisisheffing” aki ta un “coalitieheffing” pa por financia maneho nobo. Den su conseho na gobierno Raad van Advies tambe a confirma esaki. “Den e proximo tres pa cuater aña e debe lo aumenta atrobe cu 300 miyon di florin te na momento cu yega cerca na un presupuesto balansa of surplus,” Parlamentario Richard Arends ta declara.
