Durante di ultimo reunion publico di Parlamento pa trata e ley di LIM cu ta defini e reparticion di carteranan di gabinete Wever Croes, fraccion di AVP a entrega un mocion den cual ta haci a peticion pa laga Minister Glenbert Croes, atende cu asuntonan di e proceso pa reapertura di e refineria di San Nicolas.
Esaki a wordo haci pa motibo di e envolvimento di Minister Croes durante di henter e proceso pa haya un operador nobo pa e refineria di San Nicolas, caminda el a reuni cu varios funcionario halto Venezolano y cu a wordo reconoci pa su partido MEP y e actual Prome Minister Evelyne Wever Croes.
Parlamentario pa fraccion di AVP, Arthur Dowers ta mustra cu pa gran asombro por a scucha den Parlamento, expresionnan di propio miembronan di e fraccion geel, cu no por confia Glenbert Croes cu e proceso aki y tin cu laga esaki resorta bou di Prome Minister.
Henter e desaroyo aki segun Parlamentario Dowers ta otro prueba concreto cu no tin mucho confiansa den Minister Glenbert Croes, kende hasta a wordo forsa pa tuma e actual ministerionan cu e tin actualmente, ya cu hasta e proceso di screening lo a ser uza contra di su persona den esaki.
E proceso di screening ta un proceso cu a wordo introduci pa gobierno di AVP y den cual tin cierto puntonan cu lo por a evita cu dos minister di e gabinete actual, por a bira minister, sigur uno cu tin investigacion tumando luga contra di su persona, cu acusacionnan formula pa e propio miembronan di gobierno di MEP di awe.
Sinembargo expresionnan haci durante di tratamento di e ley di LIM ta bolbe confirma cu MEP no tin confiansa den Minister Glenbert Croes y a vota contra di e mocion di fraccion di AVP, entre otro expresando cu nan no ta comodo cu e minister aki wordo asigna cu e cartera di e refineria.
Arthur Dowers a mustra cu den pasado tur hende por corda con lider di MEP, Evelyne Wever Croes a hasta organisa un grupo cu a bay yama Glenbert Croes bon bini despues cu a bira conoci cu a yega na un acuerdo cu CITGO na su regreso for di Venezuela y hasta publicamente a felicita e persona aki indicando cu ta danki na Glenbert e refineria lo wordo habri.
Awe diripiente por mira cu e reconocimento aki tabata simplemente un comedia di parti di e lider y di integrantenan di e partido ya cu awor nan no a confia maneho di e proceso di reapertura den man di Minister Glenbert Croes.
Parlamentario Arthur Dowers e siman aki a declara cu tin informacion concreto ta bin dilanti cu hasta den reparticion di carteranan dos minister lo a wordo informa cu si nan no tuma e carteranan cu a wordo ofreci na nan, lo bay over na aplica e proceso di screening den forma mas concreto loke lo a pone cu nan lo no a bira ministeriabel y consecuentemente nan mester a bay den Parlamento.
Fuera den e caso di Minister Glenbert Croes, Parlamentario Dowers a mustra cu tin e caso tambe conoci como “Strawberry gate” caminda hasta a presenta un keho oficial na Ministerio Publico pa haci un investigacion cual caso asina ta den proceso y riba cual ainda no tin claridad kico esaki lo bira den futuro.
No ta solamente e investigacion aki contra e minister scorpion ta andando pero tin otro acusacionnan serio haci contra di e minister aki pa partido MEP den pasado caminda tin otro desaroyonan cu a wordo cuestiona pa decisionnan cu el a tuma como minister den gobierno di AVP.
