Tanto durante di formacion di gobierno actual y durante reunion publico recien, gobierno a bin ta purbando y hasta insistiendo pa pinta proyectonan PPP den forma negativo, cu e unico intencion di influencia asina e intencion cu e tin di impone medida impopular riba pueblo.
Esaki Parlamentario y ex Minister di Infrastructura, Benny Sevinger ta mustra, mustrando riba e importancia y nificacion di e proyectonan aki pa desaroyo di e pais y bienestar di henter comunidad.
“For di tempo di Lago, pais Aruba a pasa den diferente desaroyo y te awe pasa den diferente faceta di desaroyo y nos por mira tanto aki na Aruba como rond mundo, un parti esencial di inversion y desaroyo economico, ta infrastructura.
Si mira cifranan presenta pa Nacionnan Uni, di cada dollar cu wordo inverti den infrastructura di un pais rond mundo, bo ta saca 1.7 dollar bek indirecto y directo for di e proyectonan aki dor di trabou y desaroyo economico, dor di inversionistanan cu ta anexo na e proyectonan aki.
Consecuentemente gobierno y pueblo di Aruba ta bay dilanti y na mes momento ta haya mas entrada como pais.
Pues si un gobierno cu a priminti pueblo cu durante 8 aña a papia di ‘mega debe’ y no tin e capacidad y tampoco e solucion ya cu ora mira cu ta solamente comision ta wordo nombra pa atende asuntonan importante pa e pais, pues nan no a prepara nan mes pa sinta riba stoel di gobernante y no tin solucion pa atende cu asuntonan importante di e pais.
Nos di AVP tempo cu nos tabata den oposicion, nos a prepara nos mes di tur forma posibel pa dia cu nos a drenta gobierno, for di prome dia nos a bin cu solucionnan pa atende diferente asunto importante di nos pais y nos a cumpli cu 99% di loke nos a pone den nos programa, AVP a cumpli cu esakinan.
Sinembargo nos por scucha e criticanan riba proyectonan di PPP como algo malo cu gobierno anterior a haci, dor di bin cu e proyectonan aki pero aki ta bon pa mustra bon cla cu no tin otro solucion pa tipo di proyectonan asina aki, wordo financia cu no ta dor di e sistema di PPP.
Esaki pa motibo cu ora cu gobierno kier haci un proyecto den e sistema normal como minister di infrastructura y haci un destaho pa e proyecto, mester tin e placa riba presupuesto di e aña ey pa haci e destaho y garantisa cu e proyecto ta bay dor pa loke ta su parti financiero.
Consecuentemente cuater di e proyectonan cu nos pais a papia riba dje for di tempo di introduccion di Status Aparte, nunca por a sigui pa motibo cu nunca e minister lo a haya e cantidad di placa aki riba su presupuesto.
E sistema di PPP ta brinda gobierno e posibilidad pa financia e proyectonan aki sin cu e lo afecta resto di presupuesto y mescos cu tur otro proyecto cu wordo ehecuta pa gobierno, esunnan di PPP tambe tin cu wordo paga, no ta nada otro cu ningun otro proyecto.
Ora cu nos a ehecuta proyectonan di scol, renobacion di careteranan of caretera nobo, of drechamento di barionan, infrastructura ta haci un destaho y e placa aki ta riba presupuesto y no ta placa cu gobierno tabatin den banco y lo a dicidi di bay traha un scol, traha un edificio nobo of pone un caretera nobo.
E placa aki ta bay den e parti di prestamo di e presupuesto di gobierno y semper pais Aruba tabatin un deficit y nos a laga esaki na 0.5% pero awe nos por mira cu gobierno ta haya espacio di gobierno Hulandes pa bay bek te na aña 2015 cu ta un deficiti di 3.5% como regalo.
Placa cu ta wordo inverti den infrastructura ta un placa cu ta wordo fia, pues mester paga esaki bek durante 10 aña depende di e prestamo cu a wordo haci como pais Aruba,” Parlamentario Benny Sevinger a mustra.
