Diamars 13 di maart ultimo, a tuma luga un reunion den Parlamento, na unda Prome Minister Wever-Croes a bin bek Parlamento, despues cu su persona a pidi algun dia pa prepara contesta riba tur e preguntanan cu miembronan di Parlamento a dirigi na su persona den e reunion anterior.
Parlamentario pa fraccion di AVP, sr Robert Candelaria tambe a dirigi un pregunta na Minister Presidente pero caminda practicamente su persona no a ricibi un contesta concreto di e mandatario.
“Riba pregunta cu mi persona a haci, si henter e gabinete actual ta para tras di e re-apertura di e refineria, sra. Wever-Croes a contesta basicamente cu gobierno ta mara na un contract cu Citgo. Mi ta compronde loke sra. Wever-Croes ta bisa, pero como gobierno bo mester sa unda y den cua direccion bo kier guia e proceso di re-apertura. El a bisa mas aleu cu opinion pa habri e refineria bek of no, no ta relevante, pero esey tabata hustamente e pregunta cardinal cu mester a wordo contesta.
Mi a haya un flyer cu partido MEP a saca luna di october di 2016, den cual ta bisa cu solo ta sali, celebrando e re-apertura di e refineria. E flyer tin un dicho di Betico Croes, den feliz memoria, caminda el a bisa cu hasta si tin 1% di chens pa habri e refineria bek, mester haci esaki.
Betico tabatin un vision y el a comunica den forma bon cla cu mester bay lucha todo por todo pa habri e refineria bek.
Aki mi tin cu mustra cu tin un mocion tambe di dia 27 januari di 2016 caminda parlamentarionan di fraccion di MEP e tempo ey, esta Wilfred Besaril, Glenbert Croes, Dangui Oduber, Chris Romero, Xiomara Ruiz-Maduro, Ady Thijsen y Evelyne Wever-Croes, y cual mocion a wordo sosteni pa Andin Bikker di AD, caminda e mocion ta ‘URGI’ gobierno di Aruba haci su maximo esfuerso pa finalisa e acuerdonan necesario pa logra RE-APERTURA di e refineria di Aruba cu PDVSA CITGO.
Mi tin cu menciona cu Glenbert Croes tabata duna e impresion cu ta e mes a habri e refineria ora cu a logra un acuerdo cu e dos companianan aki pero awor ta hopi keto.
Pa ami ta straño cu awor cu nan ta den gobierno, nos no por mira e mesun entusiasmo pa habri e refineria bek.
E deseo ferviente di cada ex parlamentario di MEP y actual ministronan tabata pa negosha cu e empresa di Citgo PDVSA specifico y habri e cos bek y mas rapido posibel.
Con bini e pasion aki a disparce asina facil y asina lihe?
Ainda no ta cla si tur e hendenan cu mi a menciona kier e re-apertura y lo lucha tur cu tin pa haci di e situacion actual un re-apertura exitoso pa Aruba.
Como gobierno e opinion di Prome Minister Wever Croes over di re-apertura ta sumamente importante y relevante y a base di su reaccion den Parlamento, ta lanta e pregunta si su persona ta na stuur di e pais den e re-apertura di e refineria aki si of no?
Un prome ministro y su gabinete sa unda kier hiba e pais pa cu e refineria y den cua direccion kier guia e proceso di re-apertura of Premier ta un pasahero y ta laga e proceso cana su mes rumbo y para wak unda e ta bay hiba e pais?
Si gobierno no stuur, un otro lo stuur pa bo, pues na luga di duna claridad riba tur loke ta tumando luga den nomber di su gobierno, nos por conclui cu el a crea mas incertidumbre riba loke su gobierno kier cu e refineria di San Nicolas, ” Parlamentario Robert Candelaria a mustra.
