Parlamentario di fraccion di AVP, sr Arhtur Dowers ta mustra cu di tur forma Prome Minister Wever Croes ta trata di convence pueblo cu su gobierno di coalicion, no por bay cumpli cu promesanan bunita haci durante di campaña, pa falta di incapacidad di gobernacion.
No solamente ta algo serio, esta cu a priminti pueblo asina hopi cos, ta sigura cu MEP lo tin solucion pa tur problema di tur hende, pa awor ta trata di alivia e mal noticia cu KB ta na caminda y literalmente ta bisa pueblo pa tin comprension cu medida ta bin pa pueblo.
No solamente e forma di gaña pueblo ta algo di condena pero den su afan pa hustifica e falta di capacidad di su gobierno, Prome Minister ta lansa insinuacionnan contradictorio caminda ta acusa Hulanda di semper a trata gobiernonan di AVP den un forma mas suave compara cu gobiernonan di MEP.
Sinembargo na mes momento cu e lider di MEP ta bisa esaki, e ta confirma cu su Minister di Finansa a subi avion diadomingo pa bay Hulanda pa negocia cu Hulanda un salida pa no haya KB riba su cuenta.
Parlamentario Dowers a sigui mustra cu tur promesa cu partido MEP a ofrece na pueblo cu tur siguransa, lo no wordo cumpli y esaki ya ta bisto cu e refineria di San Nicolas, caminda e propio lider di MEP cu otro miembronan di su partido cu ta forma parti di su gabinete, a para na porta di refineria pa exigi gobierno traha pa logra reapertura di esaki. Hasta ora cu a logra di yega na un acuerdo cu CITGO y PDVSA, partido MEP cu su lider na cabes a organisa un parada y un celebracion dilanti porta principal di e refineria.
Awe ta papia cu mester cuminsa mira Aruba sin un refineria mientras cu no tin esfuerso algun ta wordo haci pa atende cu tur loke ta pasando.
Otro promesa di elimina hedging di WEB Aruba NV a bira algo di campaña so ya cu ta gobierno di MEP den su prome 25 dianan den gobernacion, a bay di acuerdo cu otro contract di hedging mientras cu e promesa di importa gasolin mas barata, tambe ta algo di pasado ya cu te hasta a bay na introduci un aumento accijns riba combustibel cu ta data for di 2011.
E mentira di mas grandi, esta cu cualkier gabinete cu MEP na cabes lo conta cu 7 minister, a keda na un grito den desierto ya cu na final di dia e gobierno tin 8 minister mas un asina yama secretario di estado cu na papiamento politico di Aruba, ta e di nuebe minister di gabinete Wever Croes.
Prome Minister ta papia di medidanan serio pa reduci gasto di personal di gobierno, caminda den pasado un di e medidanan aki tabata pa ‘vriez’ vakantieuitkering, mescos cu indexering cu despues nunca mas e gobierno di MEP a elimina y awor ta parce cu MEP lo tin mesun intencion aki.
Ta algo di hari ora cu tuma nota cu Prome Minister ta insisti cu mester bay traha riba eficiencia di e aparato publico, cu trahadonan publico tin cu traha of bay cas, mientras cu su persona y henter su gabinete, apenas tin 120 dia trahando despues di un vacacion cu pago di ocho aña largo como partido den oposicion.
E falta di seriedad di Minister Presidente Wever Croes, ta algo increibel, caminda intento ta wordo haci y a haya sosten den comunidad pa su plan di medida, confirmando den forma cla cu su gobierno no tin otro solucion cu no ta medida.
Despues di ocho aña cu pueblo no a conoce medida awor ta para dilanti di un otro crisis economico y financiero, tur pa falta di capacidad y seriedad di e gobierno di coalicion aki, segun Parlamentario Arthur Dowers a mustra.
