Parlamentario pa fraccion di AVP, sr Richard Arends a dirigi un serie di pregunta na Minister di Finansas, Asuntonan Economico y Cultura relaciona cu e supuesto reduccion di prijs di gasolin pa loke ta trata e lunanan cu ta bin.
Segun sr Arends el a tuma nota cu e desaroyo di prijs di crudo riba mercado internacional caminda a tuma nota cu tin un reduccion mas cu loke e reduccion cu gobierno a anuncia pa mercado local.
“Prijs di gasolin riba ‘Plets worldscan’, ta mustra un reduccion mas grandi cu loke a wordo anuncia pa mercado local. Esaki ta pa motibo di un ‘coreccion’ impone pa e gobierno actual, riba un maneho di 11 aña pasa.
Mi a dirigi un serie di pregunta na minister encarga cu asuntonan economico, a base di e transparencia cu tanto a wordo propaganda durante di campaña y tambe e promesanan cu e partido mas grandi den coalicion a haci, entre otro di reduccion di prijs di combustibel.
Awe na momento cu nan por reduci e prijs di gasolin, pa mehora e poder di compra di nos ciudadanonan y reduci gasto di empresanan, gobierno ta opta pa coregi un maneho di 11 aña bieu.
Na 2007 lo a reduci accijns riba gasolin, diesel y kerosin cu 10 cen. Na maart di 2018 a aumenta accijns cu 2 cen y ainda falta 8 cen mas pa bay. Nos ta cuestiona esaki fuertemente, pasobra e ‘coreccion’ aki ta simplemente un maneho di medida nobo.
Si bo wak e cantidad di gasolin, diesel y kerosin cu ta wordo importa y e aumento di 10 cen cu ta wordo premira, nos ta papiando aki di un medida di rond di 10 miyon di florin cu e Gobierno actual a cuminsa introduci. Esaki sin conta BBO y BAZV cu mester bay di groothandel pa kleinhandel ainda. Pa fraccion di AVP esaki ta un medida silencioso, un fastball cu a wordo pasa, un forma di ‘verkapte belasting’ riba pueblo, sin cu gobierno ta transparente y bisa kico nan ta bay haci, kico ta su plan financiero.
Te dia di awe e forma di procede aki ta caracterisa e maneho cu e gobierno aki ta hibando ya cu ainda Parlamento no a sirbi un plan di maneho riba tereno financiero y tampoco riba tereno economico.
Nos ta nota un falta di pro-actividad pa loke ta esakinan y loke ta di lamenta, ya durante di campaña a haci promesa cu lo ta hopi transparente, cu lo fortifica posicion di Parlamento, pero despues di mas 100 dia den gobernacion, nos no ta nota nada di esaki.
Loke si nos por tuma nota di dje ta decisionnan hopi ad hoc, manera e aumento di accijns aki riba combustibel cuminsando den forma masha chikito.
Esaki ta di lamenta ya cu gobierno tin e oportunidad di reduci e prijs di gasolin manera nan a priminti den campaña, pero a opta pa no haci esaki pero ta opta pa coregi un maneho di gobierno anterior di MEP.
Un biaha mas Gobierno bou signatura di MEP, ta creando ‘the perfect storm’ cu aumento di accijns di gasolin, un supuesto aumento di BBO y un economia cu no a crece cen e ultimo dos añanan, nos ta creando un scenario manera na 2007 caminda inflacion a subi riba 10% na final di e aña ey, “ Parlamentario Richard Arends ta declara.
