Despues cu pa ocho aña pueblo di Aruba no tabata sa kico ta ‘medida’, un biaha mas e partido politico cu ta campeon den soluciona asuntonan di gobierno cu medida, esta MEP, ta cerca di introduci cantidad di medida.
Lider di fraccion di AVP, sr Marlon Sneek ta mustra cu den e prome 100 dianan di gobernacion, pueblo no por a mira ningun di e alivio nan priminti, no por a tuma nota di ningun solucion priminti y solamente a cera conoci c’un serie di persecucion politico, y solamente grito cu tur cos ta malo na Aruba.
Sr Sneek a sigui mustra cu e incapacidad di un gobierno cu ni sikiera por a hinca un programa di gobernacion den otro, ta confirma cu Aruba tin un gobierno cu no sa mes kico pa haci y con pa cumpli cu promesanan inalcansabel cu nan a priminti den campaña den casnan rond Aruba.
Na 2009 pueblo a pone un fin na gobernacion cu medida, ora cu AVP a haya e mandato pa cambia rumbo di un pais na rand di desaster y pa ocho aña no a impone ningun medida riba pueblo.
Awe despues di 100 dia di gobernacion, por ripara cu tur loke pueblo por spera pa e proximo lunanan, ta un serie di medida cu ainda gobierno MEPPORRED no sa con pa presenta esaki na pueblo.
Ya caba e conseho cu Gabinete Wever Croes a ricibi for di e comision di supervision CFT ta un aumento barbaro di BBO/BAZA, pa aumenta entrada di gobierno.
Tambe a bisa gobierno cu e mester introduci aumento di impuesto riba tereno, aumento di loonbelasting, aumento di invoerrechten cu sin duda lo bay percura pa un peso sin igual riba entrada di tur cas di famia.
Tur esaki ta posibel pa e motibo cu e gobierno actual no tin nocion di kico pa haci, con pa sigui cu e rumbo progresivo cu gobiernonan di AVP a inicia for di 2009 y tur cos ta indica cu desaroyo y progreso di e pais, lo bay pega formalmente.
Marlon Sneek a sigui mustra cu ya caba por a ripara con Prome Minister Wever Croes mester a yama su primo Minister GlenbertCroes na ordo despues cu el a bin cu e grito populista di aumento di salario minimo, sin discuti y analisa efecto di esaki, caminda pa colmo ni presupuesto di gobierno ta cla ainda pa mira e efecto cu esaki lo surti den finansa publico.
“A priminti pueblo hopi cos, cosnan bunita, cosnan positivo durante di campaña pero si analisa declaracion di Ministernan y nan marionetanan den Parlamento, por ripara cu tur declaracion ta domina y dirigi pa negativismo y pesimismo, tratando di traha e caminda, preparando pueblo pa e pakete di medida cu ta na caminda.
Pueblo durante di campaña electoral di 2017, nunca a wordo duna e mensahe cu medida lo ta parti di e plan di gobernacion di e tres partidonan den coalicion, pero awor cu a tuma mando di e pais, ya e mensahe cu a hiba pa pueblo no ta conta mas.
A sigura pueblo votado cu nan ta e alternativa y awor pueblo ta wordo presenta cu medida na luga di alternativanan pa sirbi e interes general.
E problema di mas grandi di gabinete Wever Croes ta con pa splica pueblo, con pa convence pueblo, cu tur loke e gobierno nobo aki por haci, ta di bin cu medida forsando pueblo un biaha mas pa paga pa nan incapacidad y seriedad,” lider di fraccion di AVP, Marlon Sneek a declara.
