Nos famia Cristian Democrata a perde den Ruud Lubbers un homber di gran taya, un persona energetico y inspirativo kende a duna guia na gobierno Hulandes pa tres gobernacion sigui y tabata tin hopi atencion pa Aruba, ex Promer Minister y Lider di AVP, mr. Mike Eman a expresa den palabranan di condolencia y convivencia na famia Lubbers, partido CDA y Hulanda.

“Como lider Ruud Lubbers a haci uzo di su talentonan manera tarea Evangelico ta dicta. E a cumpli cu e tarea aki cabalmente. Como lider di CDA y Hulanda, Ruud Lubbers a duna semper muestra di su interes caluroso pa Aruba. Ta durante su periodo di gobernacion cu Aruba a logra su Status Aparte. Tambe el a hunga un papel importante pa consolida e Status Aparte aki. Lubbers tabata tambe un gran amigo di Henny Eman, ex Prome Minister di Aruba”.

Ex Prome Minister Mike Eman ta dirigi su mes tambe na su casa Ria: ‘Cu masha dolor den mi curazon y den mi mente mi kier a extende palabranan di forsa cu fayecimento di ‘bo Ruud’. Mescos cu e tabata bo Ruud, e tabata nos Ruud tambe. Aki na Aruba nos ta recorde pa su interes humano pa henter Reino. Ta pesey cu su partida ta un perdida grandi pa nos tur cu a conoce y a traha di cerca cu ne. Ria, su trabou tabata un sacrificio grandi di bo banda loke ta di respeta. Lo bo sinti consuelo den e orguyo di por a comparti bo bida cu un persona cu a haci uzo optimal di su talentonan y cu ta regresa cerca su Creador cu mas di loke su tarea aki na mundo tabata encera.

“Partido AVP ta desea Ria, yiunnan, nietonan, partido CDA y Hulanda henter hopi forsa. Ruud lo keda bibo den nos memoria”, ex Promer Minister Mike Eman ta expresa den palabranan di convivencia na e famia. .