Segun sra Arends-Reyes e noticia cu recientemente e Minister di Enseñansa Sr. Lampe a anuncia no a cai den bon tera serca docentenan ni trahadornan di skolnan publico. Hopi tawata e reacionan dikon ta tuma un decision asina drastico pa e docentenan, trahadornan y alumnonan cu na e momentonan aki no ta depende di manehonan estricto di fundacionan. Sra Arends-Reyes ta bisa cu e ta solidario cu e docentenan y trahadornan cu awe ta den un incertidumbre cu di awe pa mayan netamente politica ta dicidi ariba nan futuro. E ta keda unilateral si a bisa cu esey lo pasa cueste loke cueste y locual e stakeholders tin di duna comentario riba dj’e ta e propuestanan. Den sra Arends-Reyes su opinion no ta suficiente pa scucha so pero pa hasi algo concreto y mustra mas seriedad y den e caso aki ta pa para e decision te ora tin un bon evaluacion di e consecuencianan pa Aruba y Enseñansa. Mester evalua e consecuencianan bon tambe pa esnan cu awe ta den e posicion huridico di docente den un stichting, ki ripple-effect e decision aki tin. Na momento cu no tin skol publico mas, ta ariba cual ambtenaar cu gelijke functie lo ta bezig ta bench mark e docentenan? Talvez e contesta ta parce logico pero no por laga asina hopi ‘loose ends’ den desicionan asina. No mester laga mucho pa interpretacion di poder di directiva di fundacionan ariba nos leynan cu ta protehe docentenan, sino ta caso tras di caso dilanti Huez lo haña contra fundacionan na momento cu tin conflicto of discrepancia di interpretacion ariba decisionan cu directiva di fundacionan ta tuma. Ta cu pan di hende ta hungando cu ne, ‘job security’ ta importante mundialmente pero sigur na Aruba tambe. Segun sra Arends-Reyes solo hecho cu ta splika cu e decision aki tin cu ser tuma pa motibonan financiero, no ta uno cu ta convense e grupo di hoog opgeleiden aki asina liher. Of tin mas rason su tras como wega politico pa riba papel mustra cu a reduci e cantidad di ambtenaar cu 1000 persona den un solo vez pa tene Hulanda contento.E gobierno nobo aki mester percura pa nos hendenan cu ta biba riba e pais aki prome, tene e hendenan di Aruba di berdad central. E decision aki lo afecta e bida di mas o menos 1000 ambtenaar, pues mil cas na Aruba cu lo no tin mucho libertad mas pa dicidi ariba nan futuro carera profesional y posicion huridico. Si di berdad ta bisa cu tur cos lo keda igual ta unda lo reduci gasto anto? Kitando personal, reduciendo salario di trahadornan? A priminiti cu Enseñansa y inversion den maestro lo ta un prioridad pa Aruba, siendo cu a conose un presupuesto di alrededor di 270 miyon florin pa Enseñansa un ‘all-time high’ durante signatura di AVP. Awor tin un gobierno nobo cu a campaña pa inverti ainda mas den Enseñansa. Pueblo por wak awor locual ta hañando bek ta reduccion, persecusion y menos posibilidad na momento cu fundacionan ta sera porta pa un alumno pa motibo di nan maneho. Fuera cu e argumento di tuma e paso aki pa motibo cu mester corta gasto, ta menciona cu kier tene politica leu di Enseñansa, siendo cu otro coleganan Minister di e coalicion MEP-POR-RED ta bai te Huez pa nombra nan hendenan den directivanan di fundacionan, kiermen e argumento aki tambe no ta uno cu ta convinciente. Si e argumentonan aki no ta suficiente pa pone e idea aki ‘on hold’, ainda tin e argumento cu e ta un decision cu no a ser tuma den consulta cu e veld, ni representantenan of sindicato. Esaki ta algo cu na 2018 ta un decision inaceptabel pues sin cu e la wordo carga pa mas gremio. Di parti di fraccion di AVP tambe a manda pregunta pa e Minister di Enseñansa y lo ta sperando ariba e contestanan. Nos maestronan y trahadornan ta e weso di lomba di nos Enseñansa y a priminti nan cu nada lo cambia y lo ta tristo pa despues nan bai ripara cu e realidad ta otro, lo ta simplemente ‘mosterd na de maaltijd’ pesey ta importante pa e voz, deseo y derecho di nos maestronan, trahadornan y alumnonan keda presente den tur momento y decision. Sra Arends- Reyes ta termina bisando cu ta spera cu gobierno recapacita y pone e decision aki on hold te ora tin un estudio ariba su efectonan.
>