Asombroso con un politico cu experiencia manera Minister Oduber, por manipula di e forma cu el a bin ta haciendo esaki den apenas dos luna di tempo den  Gabinete Wever Croes.

E mocion cu Minister Oduber a  formula  y traha pa e tres fraccionnan di gobierno aproba, a duna e mandatario oportunidad pa bati na porta di Minister di Finansa pa e haya ainda mas fondo pa su ministerio.

Lider di fraccion di AVP, sr Marlon Sneek a mustra cu ya na luna di december durante tratamento di presupuesto supletorio, Minister di Infrastructura a exigi y haya pa su gobierno pone un suma di casi 6 miyon disponibel pa renobacion di Bestuurskantoor, un proyecto riba cual a bin ta trahando añanan largo caba dor di gobierno di AVP.

Por lo pronto e Minister aki no por haci uzo di e fondo aki pa e trabou anuncia ta cu e proyecto di Bestuurskantoor tin un trayecto pa core prome cu e por wordo realisa y lo por dura hopi tempo.

Sinembargo e 6 miyon ta na disposicion di e Minister di Infrastructura y diamars ultimo Minister Oduber mes a dicidi di yama un reunion di Parlamento, a traha un mocion pa e tres fraccionnan cu ta sostene gobierno y haya tur 12 miembro, aproba e mocion aki caminda e por bay pidi Minister di Finansa loke cu e kier pa termina cu e proyecto di Green Corridor.

Ora cu analisa e maniobranan di Minister Oduber, por bisa cu mientras cu ainda Minister di Finansa y gabinete Wever Croes ta luchando pa hinca un presupuesto di 2018 den otro cu mester cumpli cu normanan stipula di 05% di surplus, Minister Oduber a pasa dilanti di tur hende y sigura un fondo cu por yega of surpasa e suma di 10 miyon florin.

Na momento cu hinca e presupuesto den otro, otro Ministerionan lo ripara cu fondonan cu nan lo tin na nan disposicion den presupuesto 2018, lo ta menos cu loke ya Minister Oduber tin na su disposicion logra a base di  conocemento di e materia despues di 7 aña den gobernacion serio di partido AVP.

Parlamentario Sneek a sigui mustra cu na dos ocasion caba Minister Oduber cu solamente un dede, a logra di tapa e “solo ta sali pa tur hende” di partido MEP, lagando nan den scuridad cu ainda nan no a ripara cu e Minister aki ta pagando nan luz.

En realidad por mira e maniobra aki di e mandatario como un triki pa haya un “voorschot”  den presupuesto di 2018 ya cu e tin aprobacion di Parlamento pa haci esaki.