Un gobierno cu a sembra locura y engaño, lo cosecha locura y engaño sin proporcion y esaki ya ta birando e caso cu Gabinete Wever-Croes-Oduber segun Parlamentario Marlon Sneek.
“Un di e engañonan grandi caba di un Prome Minister kende tin apesa 60 dia gobernando e pais aki, ta e asunto di ‘hedging’ caminda un biaha mas nos tin cu bisa cu nos no ta confia su palabra, ya cu nos conoce caba, sigur ora cu el a demostra den pasado cu e ta dispuesto pa gaña riba su mes sin problema.
Prome Minister Evelyne Wever Croes ta un hende cu bo no por kere, caminda entre otro el a sigura pueblo di e cifra, shete, shete y shete, indicando cu esun cu kier bay cu MEP den gobierno tin cu acepta cu su gabinete lo ta di 7 Minister pero awe por mira cu tin 8 Minister oficial y un extra di carambola.
Fuera di esey tin dos ex Minister trahando cu e gobierno nobo aki y mi no ta kere cu nan a bin cobra 10 placa y mester mira cuanto esaki ta costa e pais.
Otro mentira grandi cu ya caba gobierno di MEP a ehecuta, caminda tin cu bisa cu durante di campaña a sigura pueblo cu nan lo atende costo di bida y pone bienestar di Aruba na prome luga.
Un lista di cuater punto caminda entre otro a papia di intensiva control di prijs, loke no a wordo haci ainda. Lo amplia e canasta basico y cu lo baha prijs di awa y coriente pero nada a sosode.
Un di e ehempel mas grandi di e engaño aki ta punto number cuater caminda e mensahe di Prome Minister Evelyne Wever y coleganan di MEP a priminti pueblo, ta ELIMNA HEDGING pero kico nos a mira siman pasa, a firma un acuerdo nobo di hedging pa medio di WEB cu e excuus cu a firma un acuerdo di solamente algun luna pero sin cambio den prijs, sin cambio di algo otro.
Hecho ta keda cu Evelyne Wever Croes cu su partido y gobierno, a bolbe tuma pueblo cabes abou y no a baha prijs di awa y coriente ainda, caminda a priminti esaki asina cu nan drenta gobierno.
Otro triki engañoso cu Prome Minister Wever Croes a impone riba pueblo di Aruba, ta e punto cinco di su lista di promesa, caminda ta papia cu su gobierno lo importa gasolin mas barata pero awor tur hende sa cu Gobierno Venezolano a suspende tur actividad cu Aruba, Corsou y Bonaire sin cu el a haya oportunidad di sikiera tene un reunion cu mandatarionan di nos pais bisiña.
Tur esaki tabata parti di e pakete di promesa di e lider di MEP den campaña cu a carga e nomber di “hunto pa e cambio” pero e acuerdo nobo cu su gobierno a aproba, a contra di e promesa aki haci na pueblo di Aruba,” Parlamentario Marlon Sneek a mustra.