Congreso 2013 di AVP den Entertainment Center, a finalisa diasabra anochi cu aceptacion pa aclamacion di e Programa di Partido pa proximo gobernacion sigui pa un fiesta di ambiente entre publico y e 29 candidatonan di partido AVP.
E anochi di Congreso tabata un combinacion di experiencia político riba escenario cu personahenan manera mr. Eddie Croes y Marko Christiaans combina cu caranan hoben manera Angele Martijn y Cindy Clark den lesamento di e mocionnan. Candidatonan a papia di tur loke a priminti den campaña y cu a ehecuta durante actual gobernacion logrando un bon trabou, combina cu loke partido ta mira cu falta ainda. “Mi lo no ta descansa tanten cu cada soño den cada hogar, den cada skina wordo realisa,” lider di partido AVP Mike Eman hopi emociona a bisa e publico prome di a papia di e programa di partido “Progreso y Bienester pa un y tur”.
Mike Eman a splica cu tur e palabranan den e programa di gobernacion ta masha importante pasobra e ta nifica cu su persona y partido lo tey pa tur hende di e pais aki, “mescos cu Shon A Eman tabata tey pa pueblo. E curason por para pero e soño nunca lo termina …,” yen di emocion e lider a bisa mientras e tabata splica e programa di partido pa e proximo gobernacion.
Principal den e programa di partido aki ta referi na ciudadanonan di tur skina di Aruba cu e líder di AVP a bishita desde cu e y su partido a asumi gobernacion na 2009. Deseo di e ciudadanonan pa e país, ta hinca den Programa di Partido.
E cambionan cu AVP a realisa den gobernacion ta visibel den e renobacion di edificionan, Caya Grandi, barionan, “pero ainda falta”, manera slogan di e partido ta indica.
E programa di partido ta menciona cu pa e siguiente gobernacion ta sigui cu renobacion di barionan, pa henter Aruba haya un aspecto nobo, pa renobacion manera di Juwana Morto yega na tur skina. A papia di mehoracion di infrastructura den Enseñanza y awor ta toca turno na contenido di Enseñansa mes; di trabou pa esnan cu tin un malesa pero ainda por funciona den e proceso laboral; sigui goberna via Dialogo pa determina e prioridadnan pa Aruba. A priminti cu unabes cu gana eleccion dia 27 di september, cu confianza di pueblo, lo sigui cu e consulta y e respet cu a crea den Reino. Principal den e proximo gobernacion ta creacion di e tres pilar economico di pais pa crea cuponan di trabou pa esnan cu ta studiando, e líder a splica Congreso 2013, bou grito di “Bon Trabou” y aplauso. El a sigura cu tur candidato riba lista di AVP tey y a cera e compromiso pa sirbi pueblo y e país.
Cu e palabranan “Ban Sigui Traha” di e líder di Partido AVP, publico a lanta para cu nan bandera y pancarta di Bon Trabou pa duna nan aprobación na e programa di partido AVP “Progreso y Bieniestar pa un y tur”.
