Durante Congreso 2013 di partido AVP. Doina Eman, casa di Prome Minister Mike Eman no ta un figura publico. E ta mas bien un persona reserva cu tras di cortina ta traha duro pa yuda e homber cu ken e ta comparti su bida cu ne. E ta e muhe proverbial cu ta para fuerte banda di su casa pa dun’e tur sosten cu e tin mester den su carera politico. Den su discurso diasabra anochi den Entertainment Center durante Congreso 2013 di partido AVP Doina a papia di e amor grandi cu e tin pa su casa. Un amor incondicional cu a duna su casa como Prome Minister di pais Aruba, tur espacio pa por traha den trankilidad pa pueblo y pais.
Doina a conta con el a conoce Mike 33 aña pasa ora e tabata di bishita na Aruba pa casamento di su miho amiga Lisette cu ruman di Mike, Ven Eman. Eynan el a namora di Mike. Un amor cu a sigui crece y profundisa den transcurso di añanan. El a papia di su admiracion pa su casa. Un admiracion cu e ta comparti cu hopi hende mas. Esaki pa e hende suave, amoroso, caluroso, inteligente y cu hopi pasenshi cuMike ta.
“Mike a nace cu un talento unico pa inspira hende pa traha duro, pa ta uni y pa tin un curazon bondadoso. Ora AVP a gana eleccion na 2009 y Mike tabata kier pa Conseho di Minister a bay traha eyden, el a inspira centenares di hende pa boluntariamente hinc a nan tempo, energia y placa pa yuda drecha e edificio deteriora y asina e lidernan nobo por a cuminsa traha di biaha eyden”. Mas leu el a bisa cu Mike ta kere cu tur su curazon cu balornan familiar fuerte y moral halto ta trece e Arubianonan hunto den union.
Cu masha afeccion Doina a papia di Mama Blanche, mama di Mike kende a fayece na 2006. Un sla duro pa Mike y henter famia Eman. Doina “Su mama tabata su bida, e tabata su maestra y su fuente di inspiracion y forsa. E filosofianan cu ta guia Mike riba su caminda di bida ta bin di tur loke Tante Blanche a siña e y su rumannan for di tempo cu nan tabata mucha. Pa mi Mama Blanche tabata e miho suegra cu un hende por a soña di tin.” Un poco emociona Doina a conta di e bishitanan cu Mama Blanche tabata haci na casnan di anciano riba Dia di Mama. Un tradicion cu Mike a sigui cu ne te dia di awe. Otro tradicion cu Doina a bisa di ta aprecia tabata e lunchnan tradicional na cas di Mama Blanche cu tur e yiunan, amigonan y despues cu nan partnernan. E pasion di su casa den tur loke e haci ta admirabel. “Un pasion grandi pa traha shete dia pa siman pa e pais aki cu nos ta yama nos cas”.
Doina menciona den su discurso e cambionan positivo na Aruba despues di 4 aña. “Mi ta realisa cu e vision di Mike no ta algo cu a nace despues di a gana eleccion, pero cu e ta algo den dje y cu el a desaroya desde mucha. Lidernan grandi den historia di mundo a inspir’e, su mama a siñ’e importancia di educacion, su tata a lag’e cu su herencia di tabata abogado di pueblo, su ruman Henny a sirbi como ehempel. El a pone tur e conocimentonan ey hunto pa goberna e gran pais aki”.
Doina a caba su discurso bunita cu un quote di John F. Kennedy: “Mi rumannan di Aruba, no puntra kico bo pais por haci pa bo, pero puntra kico abo por haci pa bo pais”.
