Un total di 70 trahado di Triple A lo wordo manda cas den proximo dianan y esaki sin duda ta un situacion hopi preocupante pa fraccion di AVP, segun lider di fraccion Marlon Sneek.
Segun sr Sneek e informacion preocupante aki ta mustra cu tin trahadonan cu ta bibando den un incertidumbre serio, ya cu dentro di algun dia, ta dificil nan pone pan riba mesa pa nan famia come y ta un situacion cu simplemente ta inceptabel.
“Pa fraccion di AVP ta simplemente imposibel, cu tin un compania estatal, den e caso aki Triple A, cu tin un minimo di 70 trahado cu nan kier manda cas y e trahadonan ta bibando den un incertidumbre grandi ya cu nan no sa kende nan cabes lo bay lora.
Esaki ta informacionnan cu nos ta haya den nos postbus dirigi na nos for di e propio trahadonan di Triple A, kendenan ta bibando cu hopi preocupacion caminda ya nos di AVP a trece e preocupacionnan aki dilanti pero te dia di awe Minister Dangui Oduber, no ta dunando Parlamento contesta riba e inkietudnan aki.
Pa e motibo aki tambe awe diaranson mainta, fraccion di AVP a entrega un peticion pa un reunion publico pa e Minister bin duna cuenta na Parlamento kico ta locual ta tumando luga na aeropuerto di Aruba.
Tur esaki despues cu diabierna ultimo tanto Prome Minister Evelyn Wever Croes como Minister Dangui Oduber, tabata eynan ta firmando algo, cual nos no sa kico nan a firma pero di otro banda loke e trahadonan ta hayando como informacion, ta cu dia 21 di september proximo cu ta dialuna venidero, cabesnan lo bay lora.
Dia 21 di september e 50 trahadonan cu falta, ya cu tabatin 20 trahado kendenan a opta pa bay cu pakete di retiro cu Triple A a ofrece, nan lo tin cu bay, pues un total di 70 trahado di Triple A kendenan lo perde trabou.
Sin duda esaki ta algo preocupante, pasobra e trahadonan den nan carta manda pa fraccion di AVP, nan ta mustra cu e proceso aki ta uno di hopi dolor sigur ora cu nan mira un Triple A, cu recientemente a bisa tur trahado, pa ban para banda di otro manera famia, laga tur hende ta leal na otro, pero aki nos kier mustra cu lealtad ta bin di dos banda.
Trahadonan no por ta leal cubo, sacrificando dor di entrega 25% di nan salario pa ta solidario cu Triple A den tempo di crisis, pa awe e trahadonan leal aki tin cu tende cu ta bay bula nan cabes.
Tin hopi preocupacion reinando, ya cu entre otro mester puntra si a bay revisa contractnan manera esun cu Schiphol, cu NACO, tambe contractnan cu tin caminda hefenan grandi ta haya un performance bonds di entre 25 pa 75 mil florin pa aña.
A revisa eseynan tambe, e grupo aki tambe ta bay corta den nan entrada? A revisa contractnan cu tin caminda ta paga cas, cu ta paga auto, cu ta duna entre cuater pa seis pasashi pa aña pa bay bishita famia?
Realmente a tene cuenta cu esey of ta e trahado chikito ta esun cu mester bay sufri atrobe bou di un maneho cu nos a bisa caba den un conferencia enterior, cu ta hopi raro ya cu mesun trahadonan aki, den e carta cu nan a manda fraccion di AVP, ta mustra cu tabatin reunionan ‘live’ caminda a haci e pregunta na e persona cu ta atende cu finansa di Triple A, el a bisa cu e compania ta solido.
Cu Triple A por wanta un aña e sla aki anto awo di repente, caminda un di e companianan cu a cuminsa haya entrada ora cu gobierno a habri frontera bek, pues aeropuerto ta den funcion, ta bay over na corta trahadonan.
Un compania cu a haci uso di ‘loonsubsidie’ pues cu no mester a saca placa for di su caha, ta bay over na bula cabes di 70 trahado y pa fraccion di AVP, e cos aki merece un splicacion y pa tal motibo nos a manda pidi presencia di e Minister den un reunion publico di Parlamento.
Nos ta spera cu Presidente di Parlamento ta yama e reunion aki mas pronto posibel y awe ta dia 16 di september caba y ban mira si pa otro siman nos por haya Minister Dangui Oduber den Parlamento pa e bay duna cuenta riba kico ta pasando na aeropuerto.
Sigur di un compania cu supuestamente mester ta solido para, ya cu e compania a caba di haci un prestamo di 500 miyon florin, pues fondonan di e compania aki mester ta solido cu a logra un fiansa di e magnitud aki ya cu ora un hende bay banco y trata di fia 10 mil florin, e hende no ta haya e prestamo aki si e no tin moda di paga e placa bek.
Pa presta Triple A 500 miyon florin ta pa motibo cu e compania aki ta solido para y ta un compania cu den e ultimo 10 añanan si mira nan bukinan, nan tabatin entre 16 y 23 miyon florin nan tabatin como ganashi.
Awor ta lanta e pregunta di kico ta e motibo cu ta mandando e trahadonan aki cas y fraccion di AVP ta spera cu Minister Dangui Oduber bin Parlamento y duna e trahadonan y pueblo claridad riba e situacion sumamente preocupante aki,” lider di fraccion di AVP, Marlon Sneek a declara.
