SDG # 4: CALIDAD DI ENSENAÑSA
Con ta sigura tur mucha enseñansa di calidad? Kico mester ta e idioma di instruccion den enseñansa? Kico mester haya mas atencion den enseñansa: preparacion pa un trabou of desaroyo personal di e alumno? Mester renoba enseñansa usando mas tecnologia electronico of mas atencion personal di maestronan di scol? Tecnologia por remplasa e rol di maestro di scol?
Loke nos scohe ta determina e calidad di nos enseñansa den futuro: e exito di cada mucha of solamente un grupo limita. Calidad di enseñansa ta determina si nos ta crea suficiente tecnico y profesional pa maneha tur area di nos economia y comunidad y ki balor nos lo duna na desaroyo di arte y creatividad den enseñansa.
Partido AVP a scohe pa traduci e 17SUSTAINABLE DEVELEOPMENT GOALS (SDG’s) di Nacionnan Uni, den maneho pa desaroyo di Aruba riba tur e terenonan di e SDG’s. For di e evento di “1000 Voz”den cua partido AVP a scucha loke pueblo mes ta haya cu ta e prioridadnan di desaroyo di nos pais, a sali cu enseñansa ta un di e areanan di desaroyo mas importante y un prioridad pa nos pais. Partido AVP a pidi “Fundacion Mito Croes”y “Fundacion Digna Laclé Herera”pa elabora e SDG’s den proposicionnan y liñanan di maneho pa nos pais, cuminsando cu e tema di enseñansa.
E symposio riba SDG #4, “Calidad di Enseñansa”, ta e prome symposio y discucion publico cu ta wordo organisa den cuadra di e SDG’s. Den e symposio aki lo trata tres tema central. E prome tema ta e relacion entre enseñansa y economia. Un di e preguntanan den e discucion di e tema aki ta si enseñansa mester sigui primordialmente e necesidadnan di economia y mercado laboral of cu enseñansa mester percura primordialmente pa e desaroyo mas amplio posibel di e individuo y su deseo y talentonan personal.
E di dos tema lo ta e escohencia dificil pero necesario di e idioma di instruccion den enseñansa. No por pospone e desicion aki mas y sigui cu e situacion di ambivalencia cu ta reina mucho tempo caba. E escohencia por ta entre Papiamentoof Inglescomo idioma di instruccion den enseñansa basico y/of secundario.
E di tres tema cu lo trata ta e rol y importancia cu mester duna e uso di tecnologiaden enseñansa. Mester usa mas tecnologia electronico cu ta refleha mas e situacion den economia y comunidad of mester organisa scolnan y ekipa maestronan di scol mas y miho pa duna mas atencion personal na tur alumno y studiante?
E symposio lo tuma luga dia27 di November 2018, den sala di EPI. Expertonanden enseñansa, economia y otro areanan lo debati cu otro y cu publico den sala riba e temanan aki. Prome y despues di e symposio aki, e temanan aki y otro temanan di enseñansa y di e SDG’s lo wordo poni den debate publico via medionan di comunicacion social pa tur hende por participa na e debate publico aki. Fundacion MITO CROES y Fundacion DIGNA LACLÉ-HERERA lo usa e resultadonan di e debate publico aki den elaboracion di e SDG’s den maneho pa nos pais. Di e forma aki lo sigura cu e voz y deseonan cu ta biba den nos comunidad lo wordo inclui den e proposicionnan di maneho pa nos pais.
