For di 1 Augustus lo cuminsa aplica e doloroso medida di 7% BBO na frontera. E impacto lo ta sumamente grandi riba un costo di bida hopi halto caba. Riba e 7% na frontera ta bin e BBO domestico di 7% cu ta riba cada schakel. Den caso di tres (3) schakel ta papia di 21% + efecto di e 7% BBO na frontera. Cuanto esaki lo ta, ta dificil pa pronostica. Pero si tuma su efecto na 3% a 5% ta papia di un BBO efecto na final di entre 24% pa 26% den caso di tres schakel. Esaki ta devastador pa nos pueblo, e lider di fraccion di AVP, mr. Mike Eman a expresa.
ACUMULACION DI MEDIDA DI GABINETE WEVER CROES
E conseho di RAAD VAN ADVIES ariba e introduccion di 7% BBO na frontera tabata hopi cla y directo: efectonan lo ta devastador pa poder di compra, inflacion, clima di inversion, turismo y nos economia en general. Raad van Advies ta hasta cita Banco Central cu ta pronostica un caida real den nos economia pa anja 2023. Esaki ta e locual e lider di oposicion, mr. Mike Eman, ta analysa cu e cifranan di inflacion actual cu ya ta pisa riba pueblo. Eman ta referi na e ultimo publicacion di CBS cu ta mustra riba con e componente di cuminda, electricidad y awa a subi caba promer cu e BBO di 7% na frontera. CBS ta mustra cu cuminda a subi cu 11.2%, electricidad cu 19.4% y awa cu 21.1%. Esakinan ta hustamente e componentenan basico cu maneho directo di Evelyne Wever Croes a causa.
HISTORIA DI MEP Y MEDIDA TA RIPITI
Y AVP TIN CU KITA NAN !
Historicamente e partido MEP semper a impone medida riba pueblo. Hopi cu ta puntra nan mes si por otro por simplemente mira bek den historia. Cada vez cu AVP a sigui un gobierno di MEP ta AVP a kita e medidanan di MEP. Na anjanan 80 AVP a kita e penoso 8.2% y e 7.3/4% y habri bek e schoolnan cu MEP a sera. Tambe AVP a habri bek e institutonan di educacion avansa IPA y Universidad di Aruba y a introduci studielening. Na anajan 90 atrobe AVP a kita e medida di aumento di 5% invoerrechten riba tur producto y a redobla e pensioen di nos grandinan. Y den anjanan 2009-2013 AVP a reduci e BBO di 3% pa 1.5% y a duna reparatietoeslag na 30.000 empleado den sector priva y reaparatietoeslag na 22.000 pensionado, indexer e salario di ambtenaren y duna inhaalmanouvre y voorjaar- y najaarspremie. Tambe AVP a introduci schoolkinderentoeslag y un aumento substancial di bijstand. AVP ta kere den inversion, fortifica poder di compra, stimula economia y educacion. Asina un Pais y un Pueblo ta crece. Y esey lo sosode atrobe “the day after Gabinete Wever Croes”, e lider di oposicion, mr. Mike Eman ta enfatisa.
