fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Vice-Presidente Howell ta suspende reunion pa carta di Prome Minister

Parlamentario di fraccion di AVP, sr Arthur Dowers a mustra cu nan ta sumamente decepciona pa e forma di procede y actuacion di e fraccionnan cu ta sostene gobierno den ultimo dia- y simannan.

“Parlamento diamars mainta e momento a yega pa trata leynan importante manera  presupuesto di Parlamento pa asina duna un señal cu nos ta bay baha salario di Parlamentarionan.

Ultimo dianan hopi hende a reacciona bisando nos cu nan no ta tende cu partido AVP ta presenta un ley pa baha salario di Parlamentarionan, sinembargo nos a bin ta splica pa algun tempo caba cu gobierno, cu tin e mayoria den parlamento y cu nan ta esunnan cu mester presenta un ley asina na Parlamento.

E situacion actual ta cu nos tin e ley aki na Parlamento, nos tin esaki wanta pa basta dia pa motibo cu tin diferente miembro di fraccionnan cu ta sostene gobierno, ta hungando kiniko cu otro cu diferente mascara bisti, cual nan ta cambia di un dia pa otro.

Ya caba  tur hende a scucha c’un di nan a papia di entrega mil florin pa luna, despues un otro grupo a bin dilanti bisa cu nan kier entrega 10% di salario pa luna, otro cu a sali grita cu e kier entrega un suma.

Sinembargo awor cu e momento di berdad a yega pa trata e ley aki, caminda lo anuncia  e suma cu berdaderamente cu nos lo bay corta den presupuesto, ningun di esunnan  cu a bisa cu nan ta bay entrega, ningun a presenta ningun opcion pa baha e cantidad di gasto cu mester paga na salario.

Esaki a pone cu fraccion di AVP a bay over na entrega un amienda caminda nos di AVP si ta bisa cu nos ta bay entrega 25% di salario di parlamento minimalmente aworaki, ya cu ainda no tin mucho claridad di parti di gobierno kico e ta bay haci.

Gobierno a bisa caba cu nan lo baha menos di  salario, locual nos tampoco ta di acuerdo cu e ponencia aki, ya cu nos ta kere cu gobernante mester baha mas.

En toda caso nos di AVP kier mustra comunidad cu nos a bin e reunion aki dispuesto na un reduccion di mas cu 15%, cual amienda a wordo firma pa tur nuebe miembro di nos fraccion y nos ta Sali for di e punto di bista cu lo tin mas miembronan di parlamento cu lo sostene e iniciativa aki y cu lo tin un mayoria pa baha e salario di parlamentarionan cu 25%.

Loke nos ta lamenta profundamente di e situacion cu a surgi awe, ta e poppenkast y comedia cu ta wordo hunga caminda for di mainta tempran cu nos ta den parlamento, wardando pa pasa u ley cu nos ta kere cu ta rekeri tanto tempo pa wordo aproba, pasobra ta increibel cu tanto ora a pasa caminda fraccionnan di gobierno ta riba un bay bin, sin nada concreto.

Loke ta mas tristo ainda ta cu te den oranan di atardi Prome Minister Evelyn Wever Croes, ta manda un carta pa Presidente di Parlamento den cual e ta bisa  cu mester baha salario di parlamentarionan cu 20% caminda pa colmo Presidente suplente di parlamento Alan Howell,  ta dicidi di suspende reunion di presupuesto di Parlamento pa reduccion di nos salario, pa atende carta aki.

Riba dje Presidente suplemente tin e curashi di bin puntra sala si nan ta di acuerdo cu e contenido di e carta di Prome Minister y si parlamento ta di acuerdo pa nos bay reduci nos salario cu 20% segun e decision di gobierno.

Algo sumamente ridiculo ya cu tur miembro di parlamento a bisa cu minimalmente lo baha salario cu 20% y caminda den reunion di comision nos a splica fraccion di MEP cu nos ta haya cu mester baha mas.

Pero awor sr Howell kende mi no por yame otro cos cu e ta un mentiroso, ya cu siman pasa su persona a bin dilanti y bisa nos cu su persona lo kier entrega mas cu 20%  y awor ta bira suspende reunion pa atende carta di Prome Minister.

Prome Minister Wever Croes no tin nada di bisa den Parlamento y nos a bisa esaki hopi cla caba siman pasa, tambe na sindicatonan caminda algun miembro di fraccion di MEP mes a sigura e sindicatonan aki cu gobierno no tin nada di bisa nan y cu ta nan ta dicidi.

Algun dia despues presidente interino ta schors e reunion importante aki pa bolbe bay papia y discuti si ta bay baha tog te cu 20% y si Howell ta pro e amienda di AVP pa reduccion di 25%, nos kier mira su persona bisa esaki pa asina e ley por pasa mas pronto posibel pa asina tur cos keda cla.

No por sigui haci wega y e wega di coalicion aki ta algo bergonsoso y practicamente presidente interno ta tene tur hende como rehen ya cu nos di AVP a haci diferente pregunta sin haya contesta, nos tin reunionnan cu nos a pidi di dos aña pasa pero cu nunca a wordo yama.

Pues nos sa con e wega politico aki ta bay pero nos si cu ora hende ta Sali pretende cu nan ta para banda di pueblo na momento di entrega, anto mester caba e reunion aki mas pronto posibel c’un decision cu ta bay entrega.

Nos ta e uniconan cu lo bay entrega c’un reduccion di 25%   y kisas hasta mas pero nos ta spera cu e tipo di bagamunderianan cu ta tumando luga dor di e grupito aki, lidera pa un scorpion, e cos aki ta caba y cu lo tin claridad pa pueblo,” Parlamentario Arthur Dowers a declara.