Durante conferencia di prensa di fracción di AVP diamars mainta, e lider di fraccion Mike Eman, a haci un yamada na gobierno, riba e deteriorio di dos edificio historico manera e edificionan di Julianaschool y Beatrixschool y na e ocasion aki tambe a hiba palabra ex directornan di Juliana School, Dolfi Kock, mr. Eddy Croes, Harold Pereira y ex directornan di Beatrixschool Richard Frank y Maurits Taytelbaum. Mientras cu tambe tabata presente tambe diferente docente cu antes a duna les na Beatrixschool y Julianaschool.
Di dos scol prominente y c’un historial educacional u cultural inmenso, pa cuater aña largo, gobierno no a haci ningun esfuerso ta cuminsa cu e proceso pa restaura y conserva e edificionan di Julianaschool y Beatrixschool.
Ningun empeño a wordo tuma pa restaura e edificionan aki cu no solamente tin nan balor historico pero nan ta den bista di bishitantenan cu ta pasa tur dia nan dilanti rumbo pa of for di aeropuerto.
Mr. Eddy Croes
Cu hopi amor y dedicacion meneer Pedro Edwin (Eddy) Croes a ocupa e funcion Directeur di Juliana School durante aña 1976 pa 1992. Meneer Croes ademas di a cultiva un amor pa enseñansa y formacion di nos alumnonan, tambe a contribui na e desaroyo politico y general di nos Pais Aruba ocupando diferente funcion clave den nos Pais, manera Presidente di Parlamento y Minister di Husticia y Ensenjanza.
Rudolf (Dolfi) Kock
Meneer Rudolf Kock, un docente ehemplar c’un amor y pasion pa hubentud y formacion intelectual y personal di nos hobennan. Meneer Kock a ocupa e funcion di adjunt directeur na Juliana School y a fungi 4 aña como Directeur di Juliana School. Meneer Kock a dedica 40 aña na formacion di nos alumnonan cu a bishita nos scol publico.
Richard Frank
Meneer Frank ta un docente special y hopi stima. Meneer Frank a fungi como directeur di Prinses Margariet School y tambe Reina Beatrix School. Meneer Frank e termina su carera na aña 1996. Meneer Frank a conserva su amor a aprecia pa Juliana y Reina Beatrix School como ex alumno, docente y director.
Harold Pereira
Meneer Pereira ta un docente experiencia cu a duna les na diferente scol basico na Aruba. Un docente recto y cu amor pa enseñansa y nos muchanan. Meneer Pereira su carera a desaroya na Juliana School. Meneer Pereira a continua su carera como docente na 1981 como docente na Julian School y a ocupa e funcion di Directeur di Juliana School entre 1996 y 2011
Maurits Taytelbaum
Meneer Taytelbaum un docente cu ta goza di un aprecio enorme di su ex alumnonan. Un docente guia pa principio y amor pa cu nos alumnonan. Meneer Taytelbaum a contribui na desaroyo cu formacion di hopi alumno cu awe ta hende homber y hende muhenan ehemplar den nos comunidad.
Meneer Taytelbaum a fungi como docente 25 aña na Reina Beatrix School, di cual 16 aña como Directeur di Reina Beatrix School.
