fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Ta pone Paul Croes sufri, pero no ta cambia e sistema

E motibo primordial pa Corte y Hof impone un castigo extra severo riba Paul Croes ta simplemente e necesidad pa pone Paul sufri. Esey ta e revancha di e sistema pa violacion grave di ley (leedtoevoeging en vergelding). Un manera pa e sistema impone sufrimento ta door di kita un hende su libertad. Pero e sufrimento cu e sistema ta crea pa un detenido no ta termina eynan. Djis imagina ncu henter e comunidad ta comenta riba bo caso. Esey ta presion social. Banda di esey un detenido ta confronta gastonan enorme di abogado, mientras tur otro gasto ta sigui normal, pero hustamente na un momento cu e detenido no por traha. Na mes momento e pareha di e detenido ta haya su mes confronta cu e peso di percura pa e hogar sigui funciona y cria e yiunan. Imagina kico e ta pa mantene cara na laira den un momento asina. Comosifuera poco, e detencion tin un impacto duro riba e muchanan. Nan por haya nan mes confronta cu stress, tristesa y depresion.

Tur e sufrimento aki ta simplemente pa satisface un necesidad di e sistema pa impone sufrimento riba e persona cu no a keda den e marconan cu sociedad a crea. Expertonan den derecho penal lo bisa: “un castigo mas severo lo preveni e persona di bolbe comete e mesun delito. Un castigo mas pisa tambe lo preveni otronan di comete e delito.” Pero, hecho ta cu un castigo ta un prueba cu e sistema a faya caba. Castigo ta e manera cu e sistema ta bringa pa haya control bek. Djis para y pensa: ora hues impone un castigo, obviamente e baca a hoga caba. Ta p’esey hues y Ministerio Publico mes lo admiti cu castigonan penal mester keda e ultimo alternativa (ultimum remedium). Enfin, castigonan penal tin tiki di haber cu prevencion.

Si di berdad soborno y fraude ta un problema, e solucion ta pa cambia e sistema. P’esey mi ta critica fuertemente e bruhamento di tera di Evelyn Wever-Croes, ora cu e ta bagatelisa e hecho cu e sistema ta daña. Es mas, su partido ta prefera bende Paul como un appel putri, mientras cu nos mester kere cu MEP ta un partido di santo. MEP ta campaña cu e slogan “integridad, nace bo ta nace cu ne”. Esaki ta un slogan cu Satanas mes a inventa. Ningun catolico of cristian serio por ripiti e slogan aki, pasobra e ta bay linea recta contra e conviccion cu nos tur ta pecador. Cristo mester a sufri y muri pa nos tur. Realidad ta cu tin politico ta bay  misa pa haya voto. Ta saca potret cu Papa, manera Evelyn y Besaril a haci, pa haya simpatia di Pueblo. Ta saca potret di nan resando, manera Evelyn cu Xiomara, pa haci comosifuera cu nan ta devoto. Hipocresia total!

Realidad ta cu Aruba mester di un overhaul. Nos organisacion y procesonan gubernamental a keda pega den tempo. Financiamento di nos partidonan politico tambe ta pega den tempo. Pero en bes di cambia e sistema MEP y RAIZ ta contento cu un screening di minister cu ta permiti Besaril sigui uza placa di Pueblo pa beneficio propio. Parlamentarionan di MEP y RAIZ ta apoya Endy Croes bira Minister di deporte, mientras Endy tabatin un caso andando contra Fundacion Lotto pa Deporte. Mientras tanto nan kier papia di integridad, transparencia y principionan di bon gobernacion. Esey ta demonstra cu henter e fanfaria di MEP y RAIZ encuanto integridad no ta nada mas cu un campaña di mercadeo pa haya voto. Mientras tanto e desaster ta continua. Nos no tin ningun inversion significativo den nos infrastructura, pero tampoco den procesonan gubernamental. P’esey comerciantenan ta sinti e tentacion pa soborna empleadonan publico y fraudenan por a tuma luga na OM, na Censo, na Dimp, cu FASE, cu comprobante di vacuna na DVG etc.

E solucion ta pa mehora nos procesonan di trabao, nos sistemanan di control. Nos mester tin e personanan adecua pa cada puesto y nos mester profesionalisa henter nos sector publico y semi-publico. E tragedia ta cu a pesar di tur sufrimento cu e sistma ta impone riba Paul y su famia, nos gobernantenan no ta haci nada pa preveni cu e sistema mes ta keda produci sospecho, delito y sensacion ora tin un entrada hudicial na DIP, cerca Otmar Oduber, Chris Romero of Edison Briesen.