fbpx
Edit

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Sosten di nos mamanan ta esencial den e situacion precario di nos pais

En coneccion cu dia di mama Parlamentario drs. Mervin Wyatt-Ras ta felicita tur mama. Riba e dia aki mundialmente ta rindi honor na nos mama, e ser cardinal den famia cu ta carga su yiu durante 9 luna, ta duna luz y den mayoria caso mundialmente ta responsabel pa educacion y cuido di su yiunan. Antes na Aruba un mama no tabata haci trabou paga y tabata keda cas pa cuida y educa su yuinan, mientras e tata tabata traha y provee financieramente pa su famia. Mas y mas durante ultimo decadanan mamanan a uni nan mes na e sector laboral. Na Aruba en especial despues di cierre di Lago, cu hopi hende homber a perde trabou den e refineria, un cantidad di hende muher cu ta alabes mama a haci nan entrada riba mercado laboral. Un cantidad di hende muher cu ta mama a labora y ta trahando den e ofishinan menos paga y den hotelnan. Hende muhernan-mama tabata t(a) pasa hopi tempo for di cas, dor di cual nan famia, yiunan y comunidad a sinti e efecto. Problemanan di pareha, relacional, educativo y psychologico a aumenta. Den anjanan nobenta a bira necesario pa lanta Centronan di Cuido pa zorg y educa yiunan di mamanan cu ta traha. Asina Centronan di Cuido, Crechenan y tambe Traimerdianan a conoce nan existencia.
Na anja 2001 Parlamento di Aruba a reglamenta Centronan di Cuido of Crechenan pa medio di e Ley di Kinderopvang. Na 2017 a aproba cambio di e ley aki, sinembargo te ainda dicho ley no a ser implementa pa garantisa cuido cualitativo di mucha, mientras mamanan ta traha.
Un otro ley cu Wyatt-Ras mes tabata un di e iniciadornan di dje ta e Ley di “Zwangerschapsverlof” cual ley a ser aproba dor di Parlamento na anja 2007. E ley aki a duna mamanan mas tempo cu nan baby prome y despues di parto. Tambe a ofrese e posibilidad di kolf lechi materno na trabou y ofrese e mama e oportunidad di traha 2 ora menos tur dia pa 9 luna despues di e parto. Cu cambio di e ley aki a boga pa duna e mama cu haya baby e oportunidad di keda mas ora cu su yiu pa facilita e proceso di “bonding“ of sera un band cu su baby, prome y despues di parto. Tambe dunamento di pecho na e baby ta stimula desaroyo sano y ta preveni sobrepeso y cierto malesanan chronico. A lanta Pro Lechi Mama pa traha preventivo y garantisa cu ta cumpli cu e ley.
Na e momentonan aki por bisa cu e hende muher-mama ta pasando den un situacion dificil. Ya prome cu COVID-19 e poder di compra di famianan, especialmente di famianan vulnerabel y di mamanan especialmente esnan soltero, a disminui. Despues di e shotdown di nos pais na 2020, e situacion di nos ciudadanonan y di mamanan (soltero) sin trabou a empeora. Tanto desempleo como falta di poder di compra y medidanan na caminda ta haci cu famianan y mamanan no por mas. Tin tanto problema financiero como social-psychologico. E impacto ta alabes riba nos futuro generacion. Landspakketten y medidanan na caminda lo empeora e situacion mas ainda. Ta necesario accion y sosten urgente di famianan y mamanan pa alivia pobresa grandi den nos pais.
Tambe ta necesario proteccion di nos mamanan di mas edad. Nan a cuida bon pa nan yiunan y ta necesario proteha nan y garantisa cu na momento cu nan tin necesidad nan ta ser skucha y yuda.
Tur esaki ta rekeri cu
enbes cu gobernantenan ta sinta gaba cuanto nan ta aprecia mamanan cu palabranan bunita den anuncionan caro, nan mester transforma e palabranan aki den actonan concreto pa alivia e situacion deplorabel, precario y preocupante di mamanan den nos pais. Wyatt-Ras ta gradici tur mama pa nan esfuerso pa saca nan famia padilanti y ta spera nan pasa un bon dia den compania di nan famia. Tambe e ta desea tur esnan cu ya no tin nan mama mas na bida hopi forsa y conformidad cu esaki.

Leave a Reply

Your email address will not be published. Required fields are marked *