Den su plataforma social ex Promer Minister Mike Eman y su señora Doina Eman a habri promer dia di aña cu un mensahe cu ta pone enfazis riba cuido di salud. Cu un potret di e pareha Eman trempan dia 1 ta cana riba Linear Park nan ta anuncia: “BACK ON TRACK ! Despues di un ausencia basta largo cu retonan cu Doina su salud nos ta back on track riba LINEAR PARK. Gradicido na nos Creador pa salud y un anja nobo. BON AÑA Aruba y principalmente hopi salud y Bendicion”. For di e mas di 1000 reaccion cu nan a ricibi ta obvio cu comunidad ta comparti nan mensahe. 

PREOCUPACION CU SALUD DI NOS HENDENAN 

Riba e tema aki Eman ta elabora mas mustrando cu durante aña y fin di aña e a keda hopi preocupa cu e cantidad di persona cu a comparti cune e retonan cu nan tin cu salud. Hopi di nan grave y hopi cu quebrante di salud cu ta afecta severamente nan calidad di bida y felicidad. “Bibando continuamente asina cu preocupacion y malestar ta roba un persona y famia di hopi felicidad y trankilidad. E ta pone e persona y famia den un estado continuo di preocupacion, inquietud y incomodidad”. Esaki mester ta un punto grandi di atencion y preocupacion pa nos como representantenan di nos pueblo, e exPromer Minister mr. Mike Eman ta enfatisa.

PREVENCION Y MOVECION 

Movecion y come saludabel sigur ta importante pa tene nos hendenan saludabel. Pa e motibo aki nos Gabinetenan a promove e temanan aki y construi hopi lugar pa nos hendenan por cana, core y distrai nan mes. Tambe a pone enfasis riba schoolnan (gezonde scholen) y cu campañanan riba importancia di movecion y come saludabel. Lamentablemente, mr. Mike Eman ta bisa, cu e gobierno actual no a sigui riba e rumbo aki y a haci tur cuminda saludabel (fruta y berdura) impagabel pa pueblo.

PAGAMENTO PA REMEDI 

E MEDIDANAN DI Gabinete Wever Croes cu cortamento den aporte na AZV tambe tin concecuencianan grave den cuido medico na Aruba. Eman ta mustra riba e hecho cu e propio dunadornan di cuido a adverti cu e medidanan aki lo conduci na un “klassezorg”. Esnan cu por paga so lo haya e cuido medico completo. Desafortunadamente, segun e dunadornan di cuido e pashentnan cu tin moda lo haya preferencia ora ta trata tratamentonan medico, cu consecuencia cu esaki ta trece cune pa loke ta calidad y accesibilidad di cuido pa esnan di menos recurso. Esaki ta locual Gabinete Wever Croes a causa cu su medidanan den cuido medico.

ExPromere Minister mr. Mike Eman a haci referencia na hopi caso cu a worde comparti cune di faminan cu no por a paga, of cu hopi sacrificio a logra di sera e placa pa paga pa remedi. Tin casonan tambe cu e a compronde for di personal di Botica cu e personanan no tin placa pa paga y ta bai cas sin e remedi cu nan tin mester pa nan salud y malestar.

DESTRUCCION DI AREGLONAN COLLECTIVO

Hopi preocupante mr Mike Eman ta haya e destruccion di areglonan colectivo na Aruba, manera cu ta tumando lugar den cuido y cu ta manifesta su mes den entrada basico di nos hendenan, den enseñansa y riba tereno laboral pa loke ta seguridad di trabou di trahadonan. E erocion di e areglonan pa garantisa un “bestaanszekerheid” pa nos pueblo ta worde destrui cu un velocidad alarmante. Ya mas un salario minimo no ta alcansa pa un existencia basico, pensioen no ta alcansa pa un existencia cu dignidad, acceso pa school pa nos muchanan ta conoce mas y mas obstaculo cu schoolgeld cu ta keda aumenta. 

E BON COMUN

Eman ta enfatisa cu su fraccion a presenta un rumbo completamente diferente den su presupuesto alternativa titula “POR OTRO. MESTER TA OTRO” pa salbaguardia e bon comun. E curso alternativa aki pa e bon

con comun ta boga pa mantencion di areglonan colectivo cu ta ofrece hende

derecho riba e servicionan basico manera un bon cuido medico, enseñansa,

seguridad di trabou y un entrada pa asina cada ken sin distinccion tin oportunidad

igual pa por yega mas leu den bida.