Kico bo ta pensa: tin transparencia of ta elabora un fix lucrativo pa e Croes Clan?Amigonan,Ayera Minister President ta malinforma riba FB cu el a introduci reglanan estricto di Corporate Governance pa stop metemento di politica den companianan estatal. Realidad ta cu ainda no tin un Corporate Governance Code pa Aruba. Realidad ta cu un estudio di Themis Institute ta demonstra cu organonan di supervision no ta cumpli cu 47.2% di principionan di Good Governance y cu 40% di nos companianan estatal no ta cumpli cu ni sikiera e minimo exigencianan di Good Governance. P’esey un Survey di CBA publica na februari di e aña aki ta informa lo siguiente: “A great majority of respondents said that the government was doing badly in fighting corruption in government.’ y ‘a great majority (71 percent) thought that politicians have no real will to fight corruption as they may benefit from it.’Sin embargo señora Evelyn Wever-Croes ta sigui haci mercadeo cu Integridad, mientras cu tin un epidemia di fraude ta tuma luga den su aparato gubernamental: Departamento di Impuesto, Censo, DVG, Ministerio Publico (OM) y e lista ta sigui… E hipocresia ta bay asina leu cu ta denuncia corupcion mientras gobierno ta infesta cu conflicto di interes y nepotismo. E palabra nepotismo ta nifica un preferencia pa duna contractnan y funcionnan publico y semi-publico na famia y amigonan. Pa combati corupcion mester tin transparencia. Lamentablemente e falta di transparencia ta asina grandi cu Prensa ta informa Pueblo y Parlamento miho cu Gobierno. Integridad, bo no ta nace cu ne. Integridad no ta algo cu bo tin’e of bo no tin’e. Integridad no ta ora bo ta skirbi integridad den bo programa di gobernacion. Integridad no ta un promesa, manera ora bo ta priminti un Integriteitskamer, un Bureau Integriteit Aruba, un Corporate Governance Code of un Ombudsman. Integridad no ta ora bo ta bati riba bo pecho cu bo ta integro, ora bo ta bin cu conceptonan di ley di screening, di financiamento di partido politico etc. Integridad ta algo cu bo ta haci! Integridad ta ora bo sa cu bo no ta perfecto, pero bo ta convenci di un codigo moral y bo ta esforza bo mes pa cumpli cu e codigo moral ey. E ta un lucha pa bo papia berdad, pa bo ta honesto, pa bo ta fair, pa bo ta cuidadoso (zorgvuldig), pa bo usa poder cu e meta pa beneficia bo comunidad y no bo mes, ni bo famia y amigonan. Integridad ta ora bo ta evita conflicto di interes y hasta e aparencia di conflicto di interes, pa asina Pueblo sinti confiansa den su gobernantenan.Ta p’esey fraccionnan di AVP, MAS y ACCION 21 a presenta un mocion di desconfiansa contra señora Evelyn Wever-Croes.