Reunion di IPKO cu a tuma luga siman pasa na Aruba, a bira uno hopi fructifero segun miembro di fraccion di AVP, sr Richard Arends, hunto cu coleganan di Reino, di Corsou, Sint Maarten y Hulanda, riba temanan comun, temanan cu ta regarda desaroyo di islanan di paisnan di tamaño chikito, loke ta wordo yama SIDS conoci den contexto di Nacionnan Uni.
Loke tambe a wordo trata durante di e reunion di IPKO a bay riba medio ambiente y energia y tambe a atende e situacion cu tin na Venezuela.
“Loke a resalta durante e bishita di e delegacionnan aki, tabata cu nos bishitantenan, Parlamentarionan Hulandes, como esunnan di Sint Maarten y Corsou, a haya oportunidad pa wak e cinco areanan fisico di oportunidad cu ta resultado concreto di inversionnan Gabinetenan Mike Eman I y II a haci y eseynan tabata e waf di Barcadera, e obranan infrastructural rond di Green Corridor y Watty Vos Blvd y tambe e waf nobo na Playa, cu tabata e ex waf di container , hunto cu e area cu antes tabata Bushiri, cual a wordo destina pa e gobierno anterior pa bira un beach publico, den combinacion cu desaroyo di e ex waf di container den cooperacion cu puerto di Amsterdam.
Tambe e delegacionnan a bishita e areanan rond di refineria, a bishita Refineria di Aruba NV como tambe e proyecto di Algen. Den e acuerdo cu tabatin cu CITGO, no ta tur tereno a wordo gehuur, pero ta terenonan cu algun di nan lo keda den poder di Aruba y a wordo destina pa desaroyo di industrianan y tecnologia limpi.
Hunto cu CITGO y tambe TNO y Refineria di Aruba, a cuminsa c’un proyecto piloto y ya na luna di September pa loke ta trata e algennan, un industria paralelo na e industria petrolero, un industria petrolero cu no necesariamente ta un industria limpi, pero den e caso di Aruba si, caminda no solamente e refineria lo funciona riba gas natural, asina eliminando emisionnan dañino pa nos medio ambiente.
Esaki lo ta acopla na tecnologia limpi y tambe industrianan innovativo y un di esakinan, e prome ta e industria di e area marino den un proyecto piloto, cu ta un proyecto di test caminda e algennan a wordo crea den tres diferente ambiente y asina lo por forma un industria paralelo banda di e refineria.
Na mes momento nos a bishita e hospital nobo caminda Parlamentarionan di Corsou, Sint Maarten y di Hulanda, a keda sumamente impresiona cu nos hospital nobo y moderno, ampliacion di e facilidadnan pa asina por brinda e servicio na nos comunidad y tambe nos bishitantenan.
E reunion di IPKO a conclui cu instalacion di diferente grupo di trabou, cu a wordo parti segun e 17 metanan di desaroyonan sostenibel cu gabinete anterior a tuma y tambe a wordo palabra den Nacionnan Uni, den contexto di Reino, bou liderazgo di ex Prome Minister Mike Eman, a tuma e metanan aki di desaroyo sostenibel den parti di nos maneho, y esaki ta refleha su mes atrobe den e gruponan di trabou.
Tin gruponan di trabou cu ta bay atende cu hende, e prome mita di e 17 metanan di desaroyo sostenibel, sigui pa un grupo di trabou cu ta trata medio ambiente pero tambe prosperidad.
Tambe e liña cora den nos maneho cu ta prosperidad comparti, pues no solamente prosperidad economico, pero tambe esey ta traduci su mes den bienestar pa tur esunnan cu ta biba na Aruba, y esey ta di dos mita di e metanan di desaroyo sostenibel.
Asina nos a parti e gruponan di trabou cu lo mester raporta den e proximo reunion di IPKO cu lo tuma luga na Hulanda na luna di mei, tambe a sigui cu e grupo di trabou di integridad y bon gobernacion cu ya caba tabata forma parti di e decisionnan di IPKO anterior.
E tabata orguyoso como miembro di delegacion di Aruba, cu por a mustra e cinco areanan fisico cu nos a identifica y nos a identifica tambe cuater sector, cuater actividad economico, cuater pilar economico nobo cual ta industrianan creativo, exportacion di conocemento, tecnologia nan limpi como tambe logistica, pa por desaroya e cinco areanan nobo aki.
Esey tabata parti di e maneho te cu 2017 y nos ta spera cu mescos cu den IPKO cu a sigui tambe cu e liña di metanan di desaroyo sostenibel, nos ta spera tambe cu e maneho economico di e gobierno nobo, tambe lo por sigui cu e diversificacion di economia segun e fundamentonan cu nos a laga atras,” Parlamentario Richard Arends a declara.