E prijs di gasolin a subi hopi y lo subi mas, paciente mester paga un contribucion pa ciudo medico, Hospital lo termina algun servicio medico pasobra e ta bira inpagabel, varios medico ta bandonando nos isla pasobra nan no tin ningun perspectiva mas, SKOA kier aumenta schoolgeld drasticamente etc. Pa un grupito rico esakinan no ta problemanan grandi. Ainda lo resta placa pa diberti y bay cu vakantie. Pero pa e gran mayoria cu mester lucha duro pa placa yega na fin di luna, e futuro ta mustra skur. E futuro lo mustra mas skur ainda si nos gobierno no tin ni energia ni vision pa crea un tiki felicidad den cada hogar. Gobierno tin e deber pa bin cu solucionnan pa deal cu e efectonan di e crisis di Covid y e guera entre Rusia y Ucrania. Hustamente pasobra Rusia ta un productor grandi di fossil fuel, e guera ta trece un crisis di energia.
Ora demanda pa un producto subi y produccion di e producto keda mescos of baha, esaki ta causa un presion pa prijs subi. Como cu riba nos isla tur cos ta liga na energia di un manero of otro, subida den prijs di fuentenan di energia ta afecta prijs di cuminda, transporte, awa, coriente etc. Na mes momento ta bon pa realisa cu fuentenan di energia manera luz di solo y biento nos tin den abundancia. Esey caba lo mester ta motibo pa pensa pa bandona energia fosil (manera petroleo y gas natural) y inverti den energia renobabel (luz di solo y biento).
Ta p’esey e mal maneho di energia di e gobierno aki ta crea asina tanto preocupacion. No solamente cerca bo persona cu ta mira con Aruba ta birando dia pa dia mas inpagabel, no solamente pa oposicion cu tin e tarea pa ta critico y cuestiona e escogencianan di gobierno, pero hasta di nos Raad van Advies. Raad van Advies ta subraya den su conseho pa cu Presupuesto 2022 cu e afan pa cera e deal cu Eagle LNG y crea un infrastructura pa gas natural por perhudica un maneho realmente sostenibel:
“[D]e fossiele brandstof aardgas [wordt] als transitiebranstof beschouwd ter vervanging van een andere, meer vervuilende, fossiele brandstof (zware stookolie). Gezien het feit, dat door deze niet-duurzame een deel van de duurzaamheidsdoelen wordt behaald, ontstaat het gevaar dat de noodzaak tot (duurzame) hervormingen naar de achtergrond verdwijnt, hetgeen een remmende uitwerking zal hebben op duurzame ontwikkeling op lange termijn en projecten tot het bevorderen van schone energie, zoals genoemd als beleidsprioriteit bij het ministerie van Economische Zaken, Communicatie en Duurzame Ontwikkeling” (pagina 10 di conseho di dia 27 di januari 2022; pidi bo copia digitial na Archief di Staten).
Locual cu señora Evelyn y señor Glenbert aparentemente no ta compronde ta cu energia renobabel ta crea stabilidad den prijsnan di awa, di coriente pa cada ciudadano. P’esey energia renobabel ta un trayecto importante pa crea un surplus den cartera di cada habitante. Esaki na su turno tin un impacto positivo riba bo economia, creando potencial pa abundancia den bo Pais.
