fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Preocupacion cu violacion di drechonan humano dor di gobierno

Violacionnan di derechonan humano dor di gobierno ta na ordo di dia. Esey tabata un di e conclusionnan di un dialogo intensivo cu a tuma luga diabierna ultimo durante otro edicion exitoso di Foruma Talking Politics na Cas di Partido. A base di preguntanan di sala panelistanan mr. Mr. Carl Giel, sra. Marlory Medina, vocero di fundacion pa proteccion derechonan humano di immigrantenan na Aruba y miembro di fraccion di AVP, dr. mr. Ryçond Santos do Nascimento a elabora entre otro riba violacion di derechonan di hende muhe, di mucha y di stranhero den nos comunidad. Moderador pa e anochi tabata e hoben jurista Wendrick Cicilia.

Panelistanan tabata preocupa tambe cu abusonan cu ta tuma luga pasobra tin vez tin ciudadano mes no ta respeta e dignidad di otro, resultando den violencia domestico, abuso di mucha y abusonan di dunadonan di trabao. A constata tambe cu banda di e violacionnan grave di gobierno tambe den nos comunidad tin hopi espacio pa mehora.

Durante e anochi tabata tin hopi ehempel cu a yega te corte caminda akeda prueba con Gabinete Wever Croes ta viola derechonan fundamental di ciudadanonan. Autoridadnan tin biaha no ta tene cuenta cu e situacion specifico di cada persona, optando pa un aplicacion formal di ley sin tene cuenta cu tur aspecto y interes involvi. Pa un ciudadano haya su derecho hopi biaha ta casi imposibel y ademas ta costa placa. Ehempelnan ta e tardansa den varios proceso di tuma decision, manera na instancianan social of ora di pidi asilo of permiso di estadia. Mas e procesonan aki tarda, mas ta laga personanan den un estado di incertidumbre, miedo y tin biaha hasta di teror.

Durante e dialogo a elabora riba varios leynan local, tratadonan internacional y e filosofia tras di derechonan humano. Hopi enfasis a ser poni riba e balor di cada ser humano sin importa edad, rasa, religion, orientacion sexual etc. E conviccion cu cada persona ta importante ta hiba na respet mutuo, na reconocimento di libertadnan fundamental y na un trato mas husto. 

Un bon dialogo no por keda sin un analisis di e solucionnan. E panelistanan a conclui cu tin espacio pa mehora e proteccion legal, sin embargo ta mas importante ainda pa fomenta conocemento y respet pa derechonan fundamental. Cambia ley of bin cu mas ley no tur ora ta e miho solucion. P’esey un parti di e solucion mester ta educacion y informacion pa cu Pueblo. Lider di partido mr. Mike Eman a trece un alternativa dilanti pa cu e manera cu nos por trece mas union den henter e comunidad: nos mester uni rond di algun proyecto comun, cuminsa traha mas cu otro, nos lo ripara e humanidad den cada un di nos. Hunto nos mester traha riba nos cas cu yama Aruba. Mr. Mike Eman a pone esaki den contexto tambe di e orientacion riba e bon comun. Pa e enfoke aki riba e bon comun aporte di tur hende ta conta, tur tin un valor pa e totalidad, di tur ramo y ofishi, ta hunto ta crea e bon comun. Asina e anochi di dialogo y refleccion a clausura riba un tono positivo yen di speransa pa crea un Pais mas inclusivo, mas husto y mas felis.