fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Obvio cu gobierno Hulandes no tin confiansa den Ministernan di Aruba

Minister Presidente Evelyn Wever Croes y Minister di Finansa Xiomara Ruiz Maduro, a mustra hopi contento diabierna mainta, ora cu den Conseho di Minister di Reino, a aproba un suma di 49 miyon di yudansa pa Aruba den un forma di prestamo riba dos aña.

Parlamentario Arthur Dowers ta señala cu aki un biaha mas ta bisto cu gobierno di Reino no tin confiansa den e maneho financiero di Gabinete Wever Croes ya cu ainda no a aproba e suma cu tanto Wever Croes como Ruiz Maduro a solicita di 1.3 biyon florin.

“Ta obvio cu gobierno Hulandes no ta confia gobierno di Aruba den persona di Minister Xiomara Ruiz Maduro y Prome Minister Evelyn Wever Croes y esaki a bolbe keda confirma den e reunion di diabierna mainta na Den Haag.

Por a nota cu e dos ministernan aki a manda ‘op hoge poten’ pidi Hulanda pa un yudansa di 1.3 biyon florin pero ta awe Hulanda a manda 90 miyon florin y ainda falta 1.2 biyon florin di loke Gabinete Wever Croes a pidi.

Hulanda ta haci esaki condiciona pa asina tene esunnan cu ta traha den e pais aki, esta economia di nos pais y e trahadonan, nan nanishi net riba awa  siendo cu Hulanda no ta mandando e placa bruto manera cu nan a pidi.

Pues claramente Hulanda no tin confiansa den gabinete Wever Croes y aki tin cu bisa cu esaki no ta nada straño ya cu Hulanda tambe a mira cu e gobierno aki a faborece un grupo grandi di ‘friends and family.’

Tambe Hulanda a tuma nota cu placa bruto a bay pa Papa, cu ta placa di pueblo, loke logicamente ta haci Hulanda hopi nervioso di por manda placa pa Aruba, sin cu tn bista hopi cla cu e placa aki ta bay unicamente na bienestar  di pueblo y no na bienestar di friends and family.

Esey ta pone cu Aruba ta para awe caminda cu e ta ya cu Hulanda no tin confiansa den gobierno y cu Aruba no por move dilanti pasobra simplemente tin un gobierno sinta eynan cu nunca a pone pueblo central, sino a pone nan famia central.

Hasta por a mira diferente delincuente cu ta forma parti di e teamnan di e gobierno aki, ta personanan cu a comete actonan criminal y a wordo condena pa paga gobierno placa pa e daño cu nan a haci na e pais, pero e gobierno aki a duna nan un salario, caminda den cierto sentido a tuma pueblo haci, ya cu e placa cu e hendenan aki mester paga na gobierno ta wordo paga pa medio di salario cu nan ta ricibi, ta pueblo cu su sodo di trabou, mester paga e placa aki na gobierno cu na su turno ta bira paga e tipo di hendenan aki.

Esaki ta un berguensa esaki ta e integridad cu e gobierno aki a priminti pueblo. Hulanda a tuma nota di esaki y pa tal motibo awe Aruba ta sinta manera un pidido di limosna pero di otro banda nos ta orguyoso cu Hulanda ta sacando man pa nos pueblo y cu Hulanda no ta lubida riba e homber chikito manera gabinete Wever Croes si a bin ta haciendo,” Parlamentario Arthur Dowers a declara.