Juan David Yrausquin: “Cu orguyo nos di AVP por cana den Noord pasobra nos a haci un Bon Trabou pa Noord tambe”
Candidato di partido AVP Juan David Yrausquin di districto di Noord, tabata masha contento y yen di gratitud pa e hecho cu pueblo di Noord a compaña e candidatonan di Noord den e Green Walk Bike den masa.
Parlamentario Yrausquin hunto cu su coleganan Paul Croes y candidato nobo Jeffrey Kelly, a bin ta trahando duro pa logra un exitoso evento pa e bario di Noord. A logra esaki pasobra e pueblo di Noord sa cu Partido AVP cu ta gobernando a cumpli cu nan.
“Awe nochi nos por cana cu hopi orguyo den Noord pasobra Gobierno a haci un “Bon Trabou”,” e Parlamentario a indica na inicio di su discurso.
El a recorda esnan presente con algún aña pasa un parti di Noord a experiencia un “down draft” cu a causa hopi daño na structuranan importante pa e bario di Noord, manera St. Anna School y Misa Santa Anna, pero tambe scol y casnan na Washington y Alto Vista. “Danki na esfuerzo grandi di cada un di mi coleganan, awe nos tin un St. Anna School completamente renoba, hunto cu ayudo di e pueblo di Aruba en general. Naturalmente cu aporte di Gobierno, awe tin un Misa Santa Anna renoba y mas bunita cu antes,” e Parlamentario a señala bou di aplauso y gritonan di “Bon Trabou”.
No solamente den emergencia Gobierno a percura pa dañonan grandi wordo drecha pero tambe tin e proyecto di Imeldahof cu a haya un renobación grandi, bou guía di Minister Hooyboer Winklaar. El a papia tambe di e trabou di infrastructra cu a wordo ehecuta bou guía di Minister Benny Sevinger unda cu na Pos Abou y Sabana Liber, a percura pa inversionnan grandi wordo haci pa evita problema di awa cu ta keda para. “Trabounan cu ta haci cu awe cu orguyo nos por cana den Noord pasobra un Bon Trabou a a wordo haci. Si awa yobe pisa mes, e ta core sin problema pasobra inversionnan grandi a wordo haci pa trece solucion.”
Tambe Yrausquin a referi na e Centro Multifuncional (MFA) cu Parlamento ya caba a duna su aprobacion p’e y cu lo ta situa banda di Centro di Bario Noord. E ta un edificio cu oficina auxiliar di Gobierno y diferente espacio cu por wordo uza door di habitantenan di e bario. “Y mi no por keda sin menciona cu ya caba el a wordo discuti, e aña’ki ainda lo cuminsa cu construccion di e MAVO / HAVO pa Noord. “
Tur e proyectonan aki a wordo haci, el a bisa, na bienestar di e habitantenan y cu ta haci cu AVP y su politico por cana cu orguyo den Noord , cu tur e apoyo.
