fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Ministernan di MEP ya a lubida di bishita comercio den Caya Betico Croes

Ex lider di MEP, Nelson Oduber a bira conoci pa un dicha cu el a hinca den otro caminda el a splica na pueblo di Aruba cu ‘campaña ta un cos, gobernacion ta otro cos,” algo cu su gobierno a cumpli cune durante ocho aña largo.

Su sucesor como lider di MEP, Evelyne Wever Croes a dicidi di mantene a pensamento aki bibo y como Minister Presidente di e gobierno di coalicion, MEP-POR-RED, despues di 7 luna na poder, e maneho di e gobierno aki ta cumpli cu nificacion di e expresion menciona, lider di fraccion di AVP, Marlon Sneek ta mustra.

“Durante di campaña electoral tur hende por corda y mira fotonan den medionan di comunicacion, caminda miembronan di fraccion di MEP e tempo ey, tabata practicamente tur siman den Caya Betico Croes, ya cu nan tabata preocupa pa e desaroyo comercial di e centro y hasta a culpa ‘parkeermeters’ di ta e motibo principal di caida di benta den centro di Oranjestad.

Por corda entre otro Xiomara Ruiz Maduro, Dangui Oduber, Ady Thijssen, Glenbert Croes y tambe Evelyne Wever Croes, canando den caya pa haci propaganda politico y pa mustra cu partido MEP lo bay tin solucion pa comercio ora nan drenta den gobierno.

Awe pueblo y comercio ta na altura cu Xiomara a bira Minister di Finansa, Dangui a bira Minister di Turismo, Ady  a bira Presidente di Parlamento, Glenbert a bira Minister di Asuntonan Social y Evelyne a bira Minister Presidente di nos pais.

Sinembargo te dia di awe, nunca y cu hopi enfasis riba nunca, e Ministernan aki a mustra nan cara den centro di Oranjestad, of a bin cana y combersa cu comerciantenan cu tin nan negoshi den Caya Betico Croes riba e desaroyonan y nan plan pa drecha esaki manera cu nan a priminti.

Hasta Prome Minister Wever Croes a dicidi na luna di november caminda ta celebra ‘Thanksgiving’ na Merca, di bula bay Miami y haci compras eynan y no a dicidi di drenta negoshinan den caya grandi y gasta algo y otro ministernan tambe a haci esaki.

Un di e promesanan grandi cu entre otro Minister Glenbert Croes  y su colega Minister Dangui Oduber a haci durante di campaña electoral, ta cu manera cu MEP drenta gobierno lo elimina AruParking  ya cu esey a mata comercio den centro di ciudad pero te dia di awe ainda nada a wordo haci y nan a lubida por completo di Caya Betico Croes.

Ya nan no tin tempo mas pa comerciantenan den centro di Oranjestad, ya cu tur atencion ta dirigi pa comerciantenan amigo, comerciantenan cu a sponsor campaña y nan si ta wordo yuda mas tanto cu por mientras otronan tin cu soluciona nan mesun problema.

Esaki ta otro di e tantisimo promesanan cu MEP a haci na pueblo  y cu no ta wordo cumpli pero atrobe esey ta MEP, caminda progreso ta pa amigo y famian y medida ta pa pueblo di Aruba,” Parlamentario Marlon Sneek a declara.