fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Minister Xiomara Ruiz-Maduro den su afan di ofende hende ta acusa stakeholders den cuido di ta gañado

Ayera Parlamentario Mervin Wyatt-Ras hunto cu lider di partido AVP, MR. Mike Eman, a ricibi un recorido den hospital, durante cual nan por a experiencia e bunita trabou di enfermeronan y dokternan cu ta trata pashentnan, especialmente pashentnan di COVID-19. Ambos a ser ricibi dor di presidente di Raad van Bestuur, sr. Jaco Vroegop, dr. Latour, dr.  Selene Kock, dr. Denert y sr. Croeze. Por a tuma nota di e bon trabou cu enfermenoronan y dokternan, hunto cu longartsen ta desplegando na hospital. Palabra di aprecio, elogio y sosten ta bai pa nan. Dor di e cantidad creciente di pashentnan di COVID den e seccionnan designa pa esakinan y e cantidad di profesionalnan cu a ser contagia cu e virus, e presion a crese riba e diferente profesionalnan di cuido.  E intencion di e bishita tabata pa skucha di dunadonan di cuido kico ta nan preocupacion, especialmente pa loke nan a trece dilanti den nan carta fecha dia 12 di Januari 2021.

E carta ey a ser trata den un reunion di comision di salubridad di Parlamento. Presente tabata un cantidad di 16 stakeholders di diferente entidad y instancianan, manera e.o. e presidente di Raad van Bestuur di hospital, director di IMSAN, presidente di Raad van Bestuur di Respaldo, director di SABA, presidente di HAVA, secretario di e Asosiacion di Boticanan, presidente di ASHA, presidente di Asociasion di Parteranan, presidente di Asociasion di Apothekers, presidente di VMSA, presidente di Asociasion di Fysioterapistanan, presidente di Asociasion di Dentistanan, director di Laboratorio di Servicio, presidente di Asociasion di Specialistanan den Loondienst, presidente di ABV y tambe representantenan di hospital.  Dicho stakeholders a trece padilanti den nan carta dirigi na Parlamento cu nan ta desea pa medidanan no ser tuma manera awor ta e caso den cuido. Nan deseo ta pa sinta na mesa cu gobierno pa stop e medida di 60 miyon florin den cuido. Pa asina por yega conhuntamente na proposicionnan pa reforma cu por conduci na reduccion di gastonan di AZV. Nan tin diferente proposicion cu a ser indica den e carta cu a ser manda tanto pa Parlamento como pa gobierno y gobernador. Segun Parlamentario Wyatt-Ras ta lastima cu e minister di Salubridad no a consulta cu stakeholders prome cu el a introduci e medidanan. Prome Minister a core bai Hulanda firma prome cu tur otro pais, sin dialogisch debido cu gremionan. Parlamentario drs. Mervin Wyatt-Ras aalbes ta lamenta profundo e forma con minister Xiomara Ruiz-Maduro ta core skirbi ariba su pagina di facebook cu lider di AVP y Wyatt-Ras lo ta hunga cu sentimento di pueblo y manipula y ganja. Esey ta tipifica e forma di pensa di miembronan di e gobierno aki cu na momento cu cuestiona nan y cu ta busca information cu nan no ta of kier duna, nan tin e derecho di ofende bo. Specialmente e minister ey cu te hasta lo ta dispuesto di manda su cacho Sweety bo tras. Ta resulta cu e si ta ganja paso loke e ta indica riba su pagina di facebook ta fake. Paso e minister aki y su coleganan kier laga henter pueblo kere cu ta Hulanda ta pusha nos cu medida, mientras cu nan mes a propone y acepta e medidanan aki. Especialmente e prome minister, cu kier ple “de beste van de klas” cu na momento e kier a firma cu Hulanda el a yama gremionan hunto pero no a dialoga cu nan sino a djies anuncia kico el a dicidi. En bes cu minister Maduro a mustra su balentia pa discuti cu Hulanda y convence nan pa no tin mester di tuma asina hopi medida e no a haci esaki y awor kier acusa otro hende. Ta lastima cu nos pais mester depende di personanan como tal pa representa nos interes. A skohe pa entrega tur cos cu tin. Wyatt-Ras ta haci ademas mencion di e carta cu stakeholders den cuido a entrega na Parlamento. Den e carta aki e stakeholders a trese padilanti cu Minister Knops durante su bishita na Aruba recientemente a indica cu como condicion di Hulanda pa e diferente tranches no necesariamente Aruba lo mester tuma medida den cuido: “Tijdens het bezoek afgelopen week heeft Staatssecretaris Knops laten weten dat er geen noodzaak is om de afgesproken korting op de tranches uit Nederland per se via de zorg binnen te halen”.Si Xiomara Ruiz-Maduro ta bisa cu lider di partido Mike Eman y nos di fraccion no ta papia berdad anto Xiomara ta acusa henter e Mundo di cuido na Aruba cu nan ta ganjando.Ta keda awor na minister Dangui Oduber pa por cumpli cu veld di cuido. E ta pusha e responsabilidad riba Hulanda y AZV mientras ta claro cu ta e y su coleganan di gabinete Wever-Croes ta responsable pa tur medida cu a ser tuma y cu sigui wordo tuma. Pa haya mas claridad encuanto gastonan real di AZV, Wyatt-Ras a manda 20 pregunta pa minister di Salubridad pa contesta nan. E preguntanan ta regarda entradanan y gastonan di AZV den e ultimo anjanan, cual ta e cuidonan cu a ser postponi of tin retraso y pa cual suma, gastonan di tratamentonan den exterior y si tin espacio financiero pa preveni medidanan di austeridad. Ademas a haci pregunta encuanto loke minister Knops a menciona, esta cu por corta otro sectornan y no necesariamente solamente den cuido.