fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Minister a exigi pa tin control riba maneho di parke y a menasa directiva

Fraccion di AVP a tuma nota di e decision di directiva di Fundacion Parke Arikok pa medio di un carta den cual e directiva  completo a tuma e decision di tuma su retiro despues di presion constante di e minister encarga cu maneho di e parke nacional, Parlamentario Michael Lampe a trece dilanti.

“Nos a bin ta observando di cerca desaroyonan relaciona cu e problemanan cu directiva di parke nacional Arikok a bin haya su mes confronta cune, sigur si tuma na consideracion e importancia di e parke aki y kico e ta nifica pa yuda conserva Aruba su naturaleza.

No solamente e parke Arikok pero for di 2017 a tuma e decision cu otro areanan di naturaleza tambe lo cay bou maneho y responsabilida di directiva di FPA cualnan ta importante pa comunidad, ya cu e ta e rosea di  nos pais y tambe di vital importancia pa nos turismo pero sigur importante tambe pa beneficio di salud di nos hendenan, nos parhanan y diferente bestianan riba nos isla, nos flora y fauna cu ta refleha e rikesa di nos Aruba.

Tur esaki, dor di un maneho manera directiva mes di parke a duna di conoce e motibo pakico e ta tuma su retiro, ta dor di maneho di un minister Otmar Oduber den e caso aki, dunando menasa constante, imponiendo un presion inmenso na e directiva, cu diferente maniobra, manera un dictador pa asina e tin e poder pa dicidi con ta bay maneha e diferente areanan aki.

E rason pakico tin un directiva di e parke asina aki,  ta pasobra cu  nan ta un NGO, Non Govermental Organisation, cu ta un sistema conoci mundialmente percurando asina pa tin e forma mas transparente y mas sigur pa cuida bo naturalesa.

Ta e forma independiente pa tin un directiva di profesionalnan cu conoce e area aki, cu ta traha pa cuida e diferente areanan cu tin e meta di cuida bo naturalesa, e meta principal di esaki ta pa asina no bin diferente otro partidonan cu kisas tin otro tipo di metanan pa e areanan aki cu lo bay desaroya otro tipo di cosnan cu lo por trece e naturalesa den peliger.

Nos a haya un rapport di fundacion parkenan nacional di Aruba den cual ta mustra claramente cu e motibo cu a conduci na retiro di e directiva completo, ta pa motibo cu a surgi un dilema den maneho.

E rapport ta mustra cu e dilema aki ta consisti ora cu di un banda  gobierno representa pa minister encarga cu ROIM, esta minister Otmar Oduber, no ta duna directiva e espacio pa como NGO  haci su trabou.

E minister ta desea di tin mas control den e maneho y ta mira den su concepto cu Parke Nacional ta wordo subsidia pa gobierno y asina kier debilita e influencia di NGO den maneho di e parke.

Minister Oduber a bay asina leu, segun e rapport emiti pa directiva ta mustra, cu si e no haya cooperacion di e directiva, e lo bay over na lanta of crea otro fundacionnan y lo bay responsabilisa maneho di parke nacional Arikok y Spaans Lagoen cu e maneho di esakinan.

E rapport aki a wordo emiti 18 di juni, pues recientemente y loke ta importante pa nos realisa aki ta e forma con kier hiba un maneho como minister ya cu e ta bisando cu den tratamento cu profesionalnan, hendenan cu mester percura pa cuido di nos naturalesa, caminda tur hende sa cu esey ta e miho manera pa naturalesa ta protehi, dor di un maneho dor di NGO, dor di un directiva di hendenan cu ta traha independientemente cu ya ta cay bou di e fundacion encarga, su persona como minister ta menasa e profesionalnan aki cu si nan no kier hiba un maneho manera cu e minister kier, e lo lanta un otro fundacion riba e fundacion actual, pa asina e minister por pone su hendenan den e fundacion.

Un decision cu na mes momento lo crea un otro costo mas grandi pa gobierno, pa asina bay pone presion pa sed di poder y pone su mes hendenan den maneho di e parke, loke no ta un secreto cu e minister ta funciona di e forma aki.

Claramente aki ta bisto cu e minister tin un otro agenda ya cu si e tabatin naturalesa y medio ambiente na pecho, e minister lo a sinta cu e directiva pa asina yega na e miho maneho cu mester pa cuido y conservacion di naturalesa, ya cu si gobierno tin bienestar di nos naturalesa na pecho, e lo a actua diferente, actua den un forma mas responsabel hunto cu e directiva y asina mustra cu en berdad e tin naturalesa di nos pais na pecho” Parlamentario Michael Lampe a mustra.