Lider di AVP Mike Eman durante evento magistral na Noord: “Aruba ta berde berde, pasobra nos a haci un bon trabou”
E bon trabou na Aruba ta bisto y pueblo ta nota esaki. Ta pesey cu partido AVP ta creciendo cada dia mas y mas. E evento Green Walk and Bike na Noord tabata carga di hende cu a forma un lama berde cu olanan di speransa. Ora lider di AVP Mike Eman a subi escenario e publico grandi y entusiama tabata grita y aplaudi sin stop. E sosten pa Eman y su partido ta enorme. Eman: “No tin un miho prueba di pueblo su determinacion pa continua riba e direccion di e cambio cu a cuminsa na 2009 di locual nos ta mira awe akinan”.
Eman: “Nos a sali for di Playa, nos a sali for di Paradera, nos a sali for di Sta.Cruz, nos a sali for di Pos Chikito, nos a sali for di Savaneta, nos a sali for di San Nicolas, nos a sali for di Dakota y for di tur parti nos a sali pa bay direccion di Noord. Y..unda cu nos a pasa riba e caminda largo nos a haya bon acogida. Nos a wordo braza, admira y aprecia. No pa locual nos a haci, pero pa loke boso a haci na 2009”.
“Na 2009 e pueblo di Aruba a uni y a dicidi cu e momento a yega pa pone gobernacion di pais Aruba bek den man di pueblo. Awe nos ta celebra resultado di esaki”. Den su discurso acogedor lider di partido berde a bisa e multitud cu a aglomera su dilanti, cu e trabou ta hopi. “Nos ta traha di dia y anochi. Nos no ta descansa pasobra boso confiansa nos ta considera un confiansa presta. Pesey nos ta sigui traha sin descansa. Nos a drecha barionan, nos a drecha scolnan, nos a traha pa combati pobresa…pero ainda falta. E compromiso cu nos, tur candidato para cu mi akinan, ta haci awe ta pa nos continua cu e compromiso di cambio. E compromiso di progreso y di oportunidad”. Eman a bisa cu e ta pidi Dios pa sigui ta e guia di partido AVP. “Laga Dios sigui ta nos inspiracion pa e cambio por continua”.
Despues el a yama tur presente danki pa nan presencia y confiansa. Den Spaño Eman a dirigi su mes un rato na esnan di habla Spaño bisando nan cu nan tambe ta forma parti di construccion di e pais aki. Bou aplauso grandi el a termina su discurso.
