E grito populista di lider di MEP cu e hende ta central pa su gobierno, a para bira cu ‘famia y amigonan ta prome y pueblo NUNCA’ ya cu e unico herencia cu gobierno a laga pueblo cune despues di a baha, ta un pueblo cu cartera bashi y awor tambe sin remedi.
Evelyn kende tin e apodo di ‘1 April’ pa motibo di a gaña pueblo asina hopi bes, a duna honor na su apodo siman pasa, ora cu net riba e fecha aki, pueblo a wordo soprendi pa un di e medidanan mas cruel cu cualkier gobierno por a tuma contra un pueblo, esta di practicamente laga pueblo sin remedi pa haya.
Esey ta regalo di despedida di Evelyn Wever Croes ora cu e lista nobo di AZV a drenta na vigor como parti di e plan criminal di su gobierno, pa sigura Hulanda cu su gobierno lo reduci gasto medico cu 5 miyon pa luna y 60 miyon total den un aña.
Ta increibel cuanto hende ta bin dilanti y mustra cu nan a bay cu nan recette di dokter na botica y ta bin resulta cu ta nan tin cu paga practicamente tur cos for di nan salario y si nan no tin salario debi na e situacion di pandemia, e hendenan aki ta keda sin remedi cu tur consecuencia cu esaki ta trece cune.
Remedi pa stoma, pa tripa, pa ansiedad, pa calma nervionan y cantidad di otro remedi cu pueblo tabata ricibi pa añanan caba, Evelyn Wever Croes a dicidi di elimina ya cu el a firma un acuerdo cu Hulanda cu e lo haci esaki.
Pues nunca e hende tabata central pa partido MEP pero si famia- y amigonan, kendenan ta sigui gosa di regalonan cu Evelyn su gobierno a duna nan, pa sigui biba trankil te ora cu defintivamente pueblo manda e lider di MEP y henter e partido cas realmente.
No tin nada pa pueblo, despues di tres aña y mey di gobernacion, solamente medida, solamente aumento di costo di bida, solamente problemanan social mientras cu famianan, amigonan y sponsornan, ta sigui probecha di e bon trato cu gobierno di MEP a duna nan.
Algun dia atras Evelyn Wever Croes a bay prensa y a pidi “dispensa” pa motibo cu e no a logra di cumpli cu tur su compromisonan, tratando di hunga rol di victima mientras cu su gobierno tabata e ‘grote boef’ contra pueblo.
El a baha gobierno sin duna pueblo ningun alternativa, ningun promesa y ningun futuro pero ta bira pidi disculpa pa motibo cu MEP no a logra cumpli cu su compromisonan. Hasta den e mensahe aki Evelyn ta gaña ya cu debidamente el a cumpli cu compromisonan pa algun hende sin duda, apesar cu ta famia y amigonan pero el a cumpli cu nan.
Oficina di Papa a den un aña 1.5 miyon
Kevin Wever yiu di Evelyn a haya trabou na aeropuerto 2850 pa luna
JeffryAnne novia di yiu homber, coordinado cu 5320 pa luna
Maikito Croes, primo di Evelyn culpabel di falsifica paspoort traha na RDA cu 9860 pa luna
Glenbert Croes primo di Evelyn minister di su gabinete cu 15400 pa luna
Joally Croes, prima di Evelyn PR d gobierno cu 8460 pa luna
Sandra Croes vocero di gobierno cu 8460 pa luna
Endy Croes primo di Evelyn den parlamento cu 12560 pa luna
Juni Croes primo di Evelyn y ruman di Minister Glenbert, 9860 pa luna como consehero
Glendaline Croes prima di Evelyn y ruman di Glenbert como coordinado 9860 pa luna
Gisette Croes, prima di Evelyn y ruman di Minister Glenbert 9860 pa luna
Grace Koolman, mama di jiu di Rudy Croes secretaria di Ministerraad cu 11173.75 pa luna
Arleen Oduber prima y consehero di Evelyn cu salario di 7305 pa luna
Pues aki pueblo por mira cu Evelyn realmente a cumpli cu “friends and family’ y sponsornan pero pueblo ta entrega parti di salario, algun salario completo y pa completa e fracaso grandi gobierno di MEP di Evelyn, awor pueblo ta core riesgo di perde nan bida pa falta di medicamente necesario cu pa hopi tempo nan tabata haya pero cu Evelyn a sigura Knops cu e lo kita e remedinan aki for di pueblo.
