fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Mansur ta un menasa pa nos democracia

Miguel Mansur ta un peliger pa democracia. Esey el a demonstra den su articulo di ayera, dia 12 di februari. Democracia ta nifica cu pueblo ta goberna. Pa Pueblo por goberna, e ciudadano mester por participa di e dialogo y debate publico encuanto tur topico cu e ta haya importante. Pa por participa e ciudadano mester tin e libertad di religion y di filosofia di bida. Asina e ciudadano por cuminsa forma su mesun opinion. Como cu ta den dialogo nos ta perfecciona nos mesun pensamentonan, tambe mester por tin e derecho di reuni, di manifesta y e libertad di expresion. Ademas mester tin derecho di voto cu ta permiti e ciudadano participa di e decisionnan importante di su comunidad. Di e forma aki derechonan humano ta forma un garantia cu democracia por existi y cu democracia no ta cay den un dictadura di e mayoria. P’esey tin e dicho constitucional na  Ingles cu ta describi e democracia pluralista: “Majority rule and minority right.”

Ora Miguel ta yama e expresion di opinionnan dilanti bestuurskantoor un atentado contra nos democracia, obviamente e no ta compronde kico democracia ta. Pero ademas di ta completamente ignorante, su pensamento ta hopi peligroso: si bo no ta comparti su opinion e ta busca manera pa silencia bo. Segun Miguel e tin e derecho di silencia e pastornan a base di e separacion di Iglesia y Estado. Esey ta un perversion grave di e concepto di separacion di Iglesia y Estado, cu ta e idea cu institucionnan di e Iglesia y di e Estado no por eherce autoridad den e asuntonan interno di otro. Esey ta hustamente parti di e libertad di consciencia y e libertad di religion. Miguel ta insinua cu e Iglesianan no mag di haci ningun accion democratico y cu nan mester lanta un partido politico prome cu nan mag di papia. Censura ta antidemocratico. En cambio e lidernan religioso a recoge firma, a expresa nan opinion y a haci nan peticion na nos gobernantenan. Esey ta un demonstracion grandi cu nos democracia ta bibo. Mansur kier caba cu e democracia aki door di tapa boca di religiosonan, door di nenga nan un plataforma y door di nenga cu nan ta parti di nos sociedad. Pasobra e lidernan a expresa nan opinion, Mansur kier declara e lidernan religioso persona non-grata, revoca nan permiso di estadia y deporta nan bek pa nan pais sin mas. Imagina bo ki tipo di dictador Mansur lo ta si e haya poder y bo bisa algo cu e no ta gusta. Djis observa su critica riba prome minister. Pasobra e prome minister ricibi e pastornan cu dignidad, reconociendo nan autonomia personal y libertad, Miguel ta acusa Evelyn Wever-Croes di falta di liderazgo, di ta antidemocratico y di a sucumbi na e forsanan di odio y division cu kier viola balornan Arubano. Peligroso ta cu Miguel ta dispuesto pa troce e principionan constitucional pa impone su vision propio. 

Miguel ta imagina cu e ta e gran defensor di democracia, pero ora pastor Joël Jansen ta corda parlamentarionan con democracia ta traha a base di voto, Miguel kier tilda e ponencia di e pastor como un menasa. Sin embargo democracia ta rekiri cu parlamentarionan busca compronde e boluntad di Pueblo y ehecuta e boluntad di Pueblo. No ta e pastor ta e menasa pa democracia. 

Parti di e gritamento encuanto democracia ta pa hende lubida e exhibicionismo y provocacion sexual di turistanan cu a bin cu e barco crucero siman pasa. Si di berdad Miguel ta un activista radical, ta logico cu e ta apoya un strategia cu ta yama ‘desensibilisacion’: bombardia e publico cu asina tanto actonan homosexual cu hende ta custumbra cu e actonan ey pa nan bira algo normal. Esey tabata e plan tras di e sunchi entre Madonna y Britney Spears (2003), e relacion sexual entre Jake Gyllenhaal y Heath Ledger den Brokeback Mountain (2005) y e sunchi entre Bad Bunny y e bailarin na e MTV VMA di 2022. Pero activismo aki ta bay un stap mas leu. E siguiente paso simplemente ta terorismo psicologico: mester ataca tur religioso di tur forma posibel. Aparentemente esey tabata e intencion di Miguel, ya cu e te hasta ta sugeri cu e iglesianan ta haya subsidio y cu nan no ta paga belasting. Siguientemente e kier hasta coverti belasting den un arma contra religion, menasando di bin cobra belasting pa motibo cu pastornan a expresa nan opinion den un luga publico. Na mes momento activistanan manera Miguel kier pinta tur religioso tradicional como fanatico, bobo, anticua, odioso y “homofobico”. 

E realidad ta cu e tipo di activismo aki ta odia cristianismo y kier destrui cristianismo. E activismo aki kier crea asina tanto spanto cerca hende manera dominee Hazenoot, pastor Frank Daal of pastor Joël Jansen, cu un religioso ta keda keto pa motibo di miedo. Esey absolutamente no ta democratico. Haci uzo di e oportunidad pa ataca e opinion di religiosonan como homofobia, stigmatisacion, discriminacion y atake contra salud mental di personanan LGBTQI+ ta un hipocresia completo! Djis ripara e odio profundo contra norma y balornan tradicional. Enfin, nos ta stima homosexualnan, pero e activismo aki di Miguel Mansur ta merece rechaso total. Asina ta. Sin kita sin pone!