fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Gobierno no kier enfrenta nos desesperacion nacional

Ora nos cartera ta bashi y no tin placa na banco nos ta confronta depresion. Ora no tin cuminda tin desesperacion. E sufrimento aki ta aumenta ainda mas pa motibo cu no tin ni sikiera placa pa paga transporte. Esun di nos cu ta mayor tin miedo cu mayan no lo tin placa pa manda e muchanan skol. Pa completa asunto gobierno kier haci’e dificil pa bo haya cuido medico.
Ta obvio cu MEP-RAIZ no tin un pista con pa crea speransa pa nos sali di e depresion y desesperacion nacional aki. Gobierno no tin un pista con pa crea condicionnan pa mehora nos bida. P’esey MEP-RAIZ ta bira cara pa e hecho cu nos no por biba cu menos cu Afl. 4.000,-. Bo tin awa, coriente, huur, telefon, gasolin y cuminda pa paga. Anto ainda nos no a papia di seguro di auto, plaachi number, diferente impuesto y mas. Kico ta resta pa cumpra paña of pa diberti cu famia?
Si bo famia ta consisti di 2 mayor y 2 mucha bo mester por lo menos Afl. 4.920,- pa hiba un bida digno. CBS ta confirma esaki. Pero e realidad ta cu mayoria di nos famianan ta gana menos cu Afl. 4000 pa luna. Esey kiermen cu mayoria ta sufriendo financieramente. Banco Central ta confirma cu poder di compra a baha significantemente. Stress y preocupacion financiero ta domina nos bida y ta cabando cu nos Pais. Si MEP-RAIZ no kier kere esaki, nan por bay lesa kico Banco Central ta bisa di bienestar general di famia cu ta afecta. Solamente un grupito di 20 porciento di nos poblacion ta contento cu su situacion financiero, mientras pa mayoria di nos salario no ta yega fin di luna. Hopi di nos tin demasiado debe y tin problema pa cubri nos gastonan mensual. Pa por cumpra cuminda hopi di nos mester fia placa di famia of nos dunado di trabou y hopi di nos ta buscando un side-job of trabou extra.
Ta straño con Gobierno no kier pa nos papia di e problemanan aki. Minister-president ta prefera monta un circo den parlamento ora ta trata presupuesto pa no duna cuenta di e depresion nacional cu nos ta bibando. Ta obvio cu e no tin solucion y cu e mes no ta mira e salida. Bao di su mando desesperacion ta sigui crece den Pueblo. Su falta di liderazgo ta aumenta nos depresion, ta caba cu nos famianan y nos salud. P’esey e ta bira cara pa conflicto entre pareha, violencia domestico y adiccion den nos comunidad. P’esey ta bira cara pa criminalidad bao nos hobennan, pa e falta di productividad na trabao y pa e cantidad alarmante di problema mental.
Si nos keda depende di e mentalidad mediocre di e gobierno aki, Aruba lo sink. Pa nos sali di e situacion aki nos mester kere cu nos por enfrenta e problemanan aki y nos mester traha duro pa nos cambia nos destino. Nos mester lidernan cu tin fe cu nos por ta un exito atrobe, lidernan cu lo traha duro pa crea prosperidad den cada hogar.