fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 E recorte di casi 25 miyon e aña ki den Enseñansa ta conduciendo na situacionan inaceptabel

Segun sra Arends-Reyes por corda cu na comienso di e gobernacion di coalicion, e miembronan di coalicion tawata papia diferente cu awor. Tawata papia cu kier aumenta e presupuesto di Enseñansa na mas porcentage di e GDP, tawata papia cu lo kier brinda trahadornan di limpiesa na scolnan un mihor salario, tawata rotundamente en contra di independisacion di scolnan publico, ta sostene extra ayudo na scolnan door cu e mesun gobierno a manca e centro multidisciplinario. Den aña 2020 e parlamentarionan di coalicion a tira serbete den ring pa cu Enseñansa y alavez tira tur culpa riba covid-19 y si por tambe riba oposicion, door cu nan ta core auto ta keda wak den spiel patras, lubidando cu ta dilanti nan tin cu wak. Lubidando cu ta nan ta goberna y mester tuma responsabilidad pa cu nan decisionan, pero nan ta prefera bringa cu otro, pone otro bou presion pa vota pro of tur ta bai cas, tur esaki mientras pueblo ta sufriendo eyfor. Esey ta e realidad cu nos ta bibando aden na Aruba. Ainda na aña 2019 a pidi Minister di Enseñansa pa para su planan, cual por cierto e no a hasi. Awor nos ta haña cu e Minister di Enseñansa ta sumamente orguyoso cu e por a spaar casi 25 miyon den Enseñansa, kitando pan di mamanan di famia, cu ta traha duro tur dia ta percura pa hygiena na scolnan di Aruba, kitando pago pa mentor uren, zorg, remedial teaching, jaarlaag coördinator, kitando instructornan di natacion for di payroll y si por otro Ministerio drecha scolnan cu fondonan di calamidad nacional. E directiva di e fundacionan cu tin cu percura pa e scolnan busca pa haña manera pa saca nan som, aumenta schoolgeld no ta un opcion, si basicamente full Aruba a bai atras den entrada. Basicamente gobierno ta pusha e fundacionan aki pa cuminsa kita personal of rebaha nan salario of hasi tur dos. Ta yega un momento cu e presion ta bira demasiado pa pone riba e fundacionan cu na nan lugar ta pase pa scolnan y na su turno ta yega na situacionan den Enseñansa nunca antes bisto. Docentenan cu ta traha sin wordo paga manera mester ta, docentenan cu ora ta kere lo wordo paga ta ricibi entre 10% pa 40% di locual nan a traha pe cu falta. Fraccion di AVP a manda 507 pregunta pa e presupuesto supletorio y conta cu un cantidad tawata destina pa Enseñansa. E contestanan tawata hopi cla cu basicamente a reafirma locual a pasa den e tratamento di e presupuesto supletorio, e confirmacion cu tur e planan pa independisa scolnan publico ta bai door!, natacion den scolnan preparatorio ta un done deal, sinta cu instructor cu tin cu salvaguardia e seguridad? No mester, segun contestacionan, nan lo simplemente wordo informa! Scolnan cu mester mas material y material di hygiena pa combati e pandemia aki, tur fundacion segun gobierno lo mester percura pa esey. No ta gobierno su problema cu otro palabra. E personal di limpiesa antes cu tawata conose beneficionan y un bonus aki aya, awor no ta ni riba payroll di gobierno mas. Si nan yega cas cu mitad di e salario cu nan tawata conose prome cu gobierno a dicidi di saca nan di payroll lo ta hopi. Pa e mesun trabou nan lo bai hopi atras, un trato sumamente inhumano di parti gobierno. Algun ta wardando renobacion di contract, si ta durf, a aserca sindicato pa purba intermedia pero sin mucho resultado. Despues cu a traha añanan largo den servicio pa brinda nos hobenan y maestronan un lugar limpi pa traha aden. Ta increibel locual ta pasando, maestronan y docentenan ta hopi desapunta pa e trato aki cu nan ta ricibiendo y ta cualifik’e como un castigo di parti gobierno. Enseñansa ta sufriendo, esey no ta oposicion ta bisa, esey ta esun cu sa sa, ora bishita cualkier scol of topa cualkier maestro, nan ta sinti cu nan a wordo maltrata pa e gobierno di Mep-Por-Red. Tur den Enseñansa na e momento crucialnan aki merece un trato hopi mas mihor, ta lunanan dificil tin nos dilanti caminda cu e plazo di banconan lo cuminsa stop y tur hende trahador y mayornan lo sinti’e y nos como pais mester ta prepara pa un posibel tercer ola di covid. Apenas den e luna aki un cantidad di scol a habri 100% y scolnan y Enseñansa mester tur e apoyo cu nan por haña. E recorte di casi 25 miyon no ta na su lugar, si tawata desea 25 miyon pa otro proyectonan lo mester a busk’e di afor di un of otro manera pero e situacion na e momentonan aki no tawata permiti pa corta asina drastico ariba Enseñansa sra Arends-Reyes ta termina bisando.