fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Di 235 pregunta riba amento di BBO gobierno a contesta solamente 16

Fraccion di AVP a efectua un bishita diamars mainta tempran na Gobernador, caminda a atende e forma con Gobierno ta atendiendo diferente cambio di ley relaciona cu aumento di BBO y BAZV, cual ta wordo considera un abuso di parti di e fraccion berde.

Lider di fraccion di AVP, sr Marlon Sneek a mustra cu ta na su luga pa haci un denuncia contra di e forma di  procede di gobierno, caminda diahuebs siman pasa den  oranan di atardi ta manda un  ley parlamento cu ta bay ranca 125 miyon for di saco di pueblo.

Ta yama un CC diabierna pa informa cu dialuna tin cu entrega pregunta relaciona cu e ley aki y ora cu fraccion di AVP haci su trabou y manda un serie di 235 pregunta pa haya claridad, gobierno ta bira contesta solamente 16 pregunta, kiermen cu 219 pregunta a keda sin wordo contesta pero ta bira yama reunion publico  pa diamars mainta 8’or.

E lider di fraccion di AVP, sr Sneek a sigui mustra cu esaki ta duna un impresion cu gobierno ta den ansha di morto pa pasa e ley aki,  te ainda gobierno no por splica di con e tin tanto pura asina, pero e impresion cu nan ta creando ta cu tin cos di sconde.

Gobierno tin miedo pa pueblo haya sa con a gaña nan, entre otro e pensionadonan kendenan a wordo gaña cu lo bay baha nan prima di AZV caminda cu esaki no ta berdad,  mesun cos pa esunnan cu tin salario minimo pa nan no haya sa cu gobierno ta bay hinca man den nan saco y saca mas cu 140 florin y gaña nan cu 25 florin bek.

Esunnan cu ta cobra onderstand no ta bay haya nada, ambtenaarnan cu ta bay sufri bou di e redoblacion di BBO cu ta sigur un inflacion di 10% y nan no ta haya compensacion.

E tipo di cosnan aki gobierno tin di sconde  y ta di lamenta ora cu gobierno a pretende cu transparencia ta na prome luga, bon gobernacion ta na prome luga, e ser humano ta central y awor por mira un fraccion di MEP cu no por a formula ni un solo pregunta y ta cla pa grita ‘voor’  pa staca pueblo cu cuchiu, pa hinca man den saco di pueblo y saca 125 miyon.

Ta cosnan cu ta inaceptabel y tin cu wordo denuncia y pa tal motibo fraccion di AVP a bishita gobernador den calidad como hefe di gobierno pa mustra cu parlamento no ta haya espacion real pa atende cu leynan y haci preguntanan cu tin cu wordo haci y mas cu tur cos, pa scucha gremionan.

Marlon Sneek ta mustra cu gobierno ta bay pasa un ley cu ta bay hinca man den saco di pueblo sin cu a scucha gremionan, ningun sindicato, ni SER of Raad van Advies cu a mira su conseho wordo poni un banda caminda gobierno no a contesta Raad van Advies.

Ta cosnan cu no ta bon y tin cu wordo denuncia y fraccion di AVP for di diabierna a manda un documento pa tur gremio, incluso gabinete di gobernador caminda a informa cu tin un ley ta bay pasa den Parlamento, cu lo bay afecta miembronan di e gremionan aki, caminda a mustra cu a pidi Presidente di Parlamento pa duna espacio pa scucha e gremionan pero Presidente no a ni contesta e carta aki.

Tur cos ta mustra cu gobierno a dicidi cu lo ‘bulldoze’ e ley aki sin cu a duna ningun instancia participacion den e cambionan lo bay trece y con e ta afecta pueblo den su totalidad lider di fraccion di AVP, Marlon Sneek a mustra.