Den varios ocasion Parlamentario Richard Arends pa fraccion di AVP a bin ta adverti cu introduccion di un crisisheffing den un periodo di poco crecemento economico, combina cu aumento di prijs di energia, ta receta pa un ‘perfect storm’.
Ta e mesun factornan cu e conduci na un tasa di inflacion riba 10% ora a introduci BBO mas cu 10 aña pasa. E parlamentario a subraya presencia di e mesun factornan aki na aña 2018 y ta anticipa riba un tasa di inflacion hopi eleva.
No ta desconoci cu e gastonan di Gobierno a aumenta excesivamente. Esaki ta wordo financia parcialmente door di ‘coalitieheffing’ cu a wordo introduci.
“Nos a tuma nota di e publicacionnan reciente di Oficina Central di Estadistica, unda cu ta mustra cu e prijs di productonan, e indice di consumo di prijs a aumenta caba,” segun Parlamentario Richard Arends.
Si bo haci comparacion cu e prome tres lunanan despues cu e introduci BBO na 2007, bo ta , ta haya e mesun patronchi di aumento di prijs di consumo mensual cu a experencia na den e prome lunanan despues di a introduci BBO na aña 2007.
Nos a bin ta alerta esaki, ya cu na momento cu a introduci BBO na 2007 tabata tin e mesun factornan cu a conduci un tasa inflacion di riba 10%. “E inflacion di 1.7% cu gobierno a premira no ta realistico mirando e desaroyonan di e prome luna nan,” Parlamentario Arends a remarka. “Nos ta spera cu Gobierno sa di tuma e pasonan necesario pa evita un aumento desproporcional di prijsnan”. E indice di prijs ta bayendo direccion cu ora cu a introduci BBO.
“Bo no tin crecemento economico, bo tin aumento di prijsnan di energia y bo ta aumenta e impuestonan riba lomba di ciudadanonan y empresanan pa por financia atrobe gastonan excesivo di e presupuesto 2018.”
E efecto di e “coalitieheffing” ta afecta tur hende, e ta afecta cartera di tur famia, ta afecta e gastonan di haci negoshi y e ta un sla duro pa empresanan mediano y chikito cu tabata purba mantene nan competitividad door di absorbe e gasto aki. Tur esaki tin su repercusionnan atrobe pa e crecemento economico.
