Parlamentario pa fraccion di AVP, Gerlien Croes, ta mustra cu pais Aruba ta wordo confronta cu un situacion financiero y social cu a bay hopi atras y c’un gobierno nobo cu ainda no tin solucion pa e tantisimo retonan cu pueblo tin su dilanti.
“Nos a bishita hopi cas e aña aki, papia cu hopi hende, scuchando nan situacion delicado, mas tanto nan perdida di forsa di compra y gastonan haltisimo di huur cu no por wordo cubri”
Na mes momento nos a mira e situacion social deteriora y economia di e pais stanca formalmente y cu ainda ta den un estado di hopi preocupacion.
Tin un gobierno nobo, cu ainda no ta actuando y tampoco ta atendiendo cu pueblo su dolor. Un gobierno cu a pone tur expectativa di recuperacion riba e sector turistico mientras cu otro desaroyo economico ta sigui mal pega pa motibo cu despues di 1 aña di preparacion di un Masterplan, ainda ta resulta cu no a logra tin un vision cla pa maneho di economia na nos pais despues di e huramenta.
Despues di 4 luna di consulta y ya mas cu 1 luna den e posicion, ainda no tin un plan di gobernacion y hasta Leynan pa locual ta reparticion di ministerionan ta hasi falta.
E situacion economico ta precario y urgente, y gobierno mester realisa cu tanten cu no duna sosten na comunidad y no mobilisa actividadnan economico y no brinda un of otro sosten financiero na comunidad, no lo tin recuperacion.
Pa es motibo mes mester inicia cu procesonan pa explora e posibilidadnan cu lo por hasi posibel pa ofrece esnan cu mas a wordo afecta cu ayudo por medio di subsidionan pa por alivia famianan den e incertitumbre reinando.
“Hunto cu lider di Fraccion di AVP sr. Eman, nos a inicia e proceso e siman aki pa explora y pidi informacion na gobierno ariba e topico di introduccion di un huurtoeslag na Aruba.
Mas aun considerando cu comunidad lo bai wordo confronta cu mas medida den e tempo nos dilanti, entrenan door di e reduccion den e sector medico di 60 miyon pa aña, acorda pa gobierno di Aruba cu Hulanda”.
Tambe por mira desaroyonan economico caminda prijs di comestibles ta subi practicamente tur siman y cobransanan halto di impuesto ta keda Sali, pero na mes momento no tin un perspectiva cu gobierno lo brinda alivio di un otro caminda na comunidad.
E situacion na nos pais ta delicado, e situacion merece atencion mucho mas eficiente di parti di gobierno nobo. Na e momento aki un gobierno no por sigui mustra pasividad dilanti di tur e presion grandi aki cu pueblo ta sinti tur dia.
Te cu awe comunidad no ta mira ningun accion of resultado di e asina yama Masterplan cu a prepara, for di cual e partner den coalicion tambe a gaba masha hopi mes y elogia durante temporada di eleccion.
Tin falta di maneho y na e momento aki un pueblo tin e derecho di wordo proteha, guia y yuda pa un miho porvenir,” Parlamentario Gerlien Croes a declara.
