fbpx
Edit

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Definitivamente gabinete Wever Croes no por sigui negocia cu Hulanda

Hopi ta esunnan, cu a spera diabierna ultimo, Prome Minister saca su conclusion y  admiti cu su gobierno no tin  solucion pa atende cu Hulanda riba ehecucion di palabracionnan haci pa atende cu e situacion financiero di Aruba.

Parlamentario di fraccion di AVP, sr  Arthur Dowers ta mustra cu pa di tantisimo ocasion,  Prome Minister Evelyn Wever Croes a confirma cu e no tin vision pa atende cu interes di e  pais y tampoco e tin sinceridad pa sigura pueblo di Aruba cu cosnan lo bira miho.

Hulanda a rabia cu Parlamento a dicidi di cambia e ley di LNT mientras cu tin un acuerdo riba e concepto di ley prome cu el a yega Parlamento pa wordo trata cu Prome Minister pero esaki na su turno a dicidi di sinta keto den Parlamento y laga su propio hendenan cambia e ley cu awor a bira un problema serio.

“Ora c’un pais tin un lider asina aki manea Evelyn Wever  Croes, e pais ta den problema serio ya cu nunca el a cumpli cu tur loke el a priminti pueblo di haci na 2017  pero solamente a sinta ranca placa for di cartera di tur hende, den un forma sin misericordia.

Awe e mesun lider di MEP aki ta para dilanti di CAft y RMR cu tambe ta riparando y sintiendo tur loke pueblo di Aruba a bin ta sinti ultimo cinco añanan, esta  cu Evelyn ta un Prome Minister mentiroso cu sa cu e ta gañando pero ta sigui gaña tur hende.

Ta mesun cos el a haci cu trahadonan publico, gañando tur e trahadonan cu nan sacrificio di 12.6% tabata pa yuda esunnan cu a perde trabou den sector priva pa medio di Fase, pa despues bin resulta cu ta un triki cu su persona hunto cu Minister Xiomara Maduro, a inventa pa gaña Hulanda cu nan a baha gasto di personal cu tanto miyon.

En berdad a baha gasto di personal pero practicamente cometiendo un atraco riba cartera di trahadonan publico y awor Evelyn kier duna e impersion cu ta CAft no kier pa trahadonan publico ricibi na parti di e 12.6% bek, esta e 5% cu nan mester a haya e fin di luna aki.

Awor kier papia cu sindicatonan pero  tanto CAft y RMR a informa Prome Minister y su gobierno cu nan por entrega e placa aki bek  pero nan cu saca e suma aki for di otro caminda, for di otro postnan cu tin presupuesta den presupuesto 2022 pero nan no kier, ya cu e placanan ey a bay pa cumpli cu friends and family.

Durante di bishita recien di Secretario di Estado van Huffelen, Evelyn a purba tur cos, keiro cune aki aya, papiando den su cabes sperando cu e lo haya un tiki slek for di dje pero diabierna  a resulta cu esaki no por y awor un biaha mas Aruba ta para  man bashi  y cu aanwijzing ainda colgando na un hilo.

Ora cu analisa e situacionnan aki ta mas cu claro tur hende ta conclui cu gabinete Wever Croes y Prome Minister Evelyn, no por negocia mas cu Hulanda, ya cu nan no tin confiansa den su persona, den su gobierno.

E situacion actual ta rekeri cambio, un cambio drastico di un gobierno cu a faya riba tur pero tur tereno cu pueblo di Aruba y cu Hulanda ya ora cu mandatarionan di un pais wordo cataloga como hendenan cu no kier scucha y no kier respeta palabracionnan haci, ta dificil e mandatarionan aki gana respet pa nan mes y pa nan pais den futuro.

Gabinete Wever Croes no por sigui negocia cu Hulanda ya cu no tin confiansa mas pa negocia cu Evelyn,!” Parlamentario Arthur Dowers a declara.

Leave a Reply

Your email address will not be published. Required fields are marked *