fbpx
Edit

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 AVP a entrega carta na Gobernador pa para intento di fraude electoral

Lider di partido AVP, Mike Eman hunto cu e lider di fraccion di AVP den Parlamento, Marlon Sneek, a bishita na Gobernador di Aruba, caminda den nomber di partido AVP, a entrega un carta relaciona cu loke e partido ta considera, un intento pa fraude electoral.

Na su salida for di e reunion cu Gobernador, Mike Eman a declara cu partido AVP tin preocupacion grandi pa loke ta situacion, caminda un gobierno demisionario na e momentonan aki, practicamente ta den un proceso di intento di un fraude electoral.

E lider di AVP a mustra c’un di e cosnan mas grandi di democracia c’un pais por tin, ta e legitimidad cu e ta haya for di un proceso electoral husto, un proceso electoral transparente y confiabel.

“Aruba por wak bek den su historia di mas di 60 aa di eleccionnan liber, caminda resultadonan hopi bes por varia, contrario na e perspectiva cu hendenan tabatin pero semper tur hende a biba cu e confiansa grandi, den e resultado e dia despues di un eleccion, caminda semper gana of perde, victorianan grandi, pa otronan derota, pueblo semper a mira e proceso como uno confiabel, ya cu e ta un proceso habri y transparente, caminda   comunidad por conta e votonan y por a mira cu e conteonan aki, pa medio di representantenan di nan parti den e proceso aki, durante di e conteo di voto.

Sinembargo e pensamento di bay introduci un sistema di scanning di e voto, apenas algun siman prome cu eleccion, ta algo absurdo, pasobra pa hopi e lo ta algo cu nan tin cu bay siña ainda con pa haci esaki y esaki lo bay crea un inkietud grandi cerca den comunidad.

E cambio aki no tin ningun balor adicional ya cu e hecho cu tin cu vota den e sistema tradicional y despues tin cu pasa esaki dor di un scanner, hustamente lo bay haci e proceso ainda mas largo y si ta papiando en relacion cu e situacion di covid pa e proceso cana mas lihe, e proceso di scanning aki ta bay alarga e proceso.

Aruba no por bay permiti su mes na e momentonan aki pa bay experimenta cu e sistema democratico di eleccionnan confiabel cu semper tabata existi, AVP no ta kere c’un gobierno demisionario por bin cu leynan di e embergadura aki na e momentonan aki.

No solamente e gobierno ta demisionario pero ta un gobierno cu ningun hende sa,  e mayoria cu e gobierno aki ainda por tin despues di tur desturbio interno den e coalicion, pues e no tin ningun base di apoyo formal y tampoco moral  pa cana e caminda aki.

AVP ta sigur c’un gobierno cu ta sinti cu pueblo ta cla pa manda nan cas y den un forma abrumador, awor kier haci un intento di fraude electoral cu AVP lo no bay permiti.

Nos a pone esaki bon cla na Gobernador, cu AVP, cu tin e fraccion mas grandi den Parlamento, cu ta e partido mas grandi na Aruba y si kier cambia sistemanan di votacion, e ora tin cu haci esaki luna- of añanan largo adelanta, pa tur partido duna nan aprobacion na cambionan electoral,” mr Mike Eman a declara.

Na salida di su reunion cu Gobernador di Aruba, e lider di AVP a cuestiona formalmente e intencion di un gobierno demisionario, pa impone un cambio den e proceso electoral, cu ta habri caminda pa fraude electoral.

Mike Eman a mustra cu ta sumamente dificil pa compronde e mentalidad di gobernantenan di Evelyn Wever Croes, kendenan ta kitando remedi di  e grandinan, miles y miles di mama y tata na e momentonan aki, tin cu paga pa nan propio remedinan, cu anteriormente tabata wordo cubri pa AZV.

“Miles y miles di hende tin solametne 60% di nan salario, ambtenaarnan cu pa gran parti di loke nan tabatin na entrada y beneficionan y a perde tambe casi 15% di nan poder di compra.

Pueblo di Aruba ta sufriendo bou di e situacion aki pero si gobierno tin placa pa  bay cumpra scanner.

Ta lanta e pregunta, di kende ta bay cumpra e scannernan aki? Pakico ta bay cumpra scanner, hustamente na un momento cu pueblo ta sufriendo y ta algo totalmente inexplicabel y AVP ta kere cu aki tin hopi cos cu tin cu bay wordo investiga di biaha tambe pa mira kico ta e forsanan tras di e idea aki, kico ta e pensamento tras di e idea aki y e inkietud aki nos a comparta awe cu Gobernador cu ta mustra de nomber di partido AVP, den nomber di e fraccion di mas grandi den Parlamento,  mustrando cu e gobierno aki ta demisionario y cu e gobierno aki no tin derecho  pa haci cambionan den un sistema  di eleccion caminda e confiansa den e proceso electoral, ta asina crucial.

For di momento cu Sharin Luidens di Censo  a bin duna informacion riba e cambio aki den Parlamento y caminda Prome Minister Evelyn Wever Croes a declara despues cu su persona ta para tras di e intento di fraude electoral aki, esaki pa AVP ta inaceptabel y por sinti cu pa pueblo tambe esaki ta inaceptabel.

Nos di  AVP a sigura cu nos lo bringa e asunto aki te na morto,  pasobra democracia di un pais ta algo cu tin cu salvaguardia y AVP lo para firme pa e derecho di pueblo di vota dia 25 di juni, cada voto wordo conta pa anochi Aruba por wordo libera di e gobierno di mas malo cu el a conoce den historia di e pais aki,” lider di AVP a declara.

Leave a Reply

Your email address will not be published. Required fields are marked *