artido AVP manera a bira un tradicion di tur aña, a organisa varios evento pa celebra dia di nos Himno y nos Bandera. Partido AVP a para na cuna di nos Status Aparte y pa decadanan a hiba un lucha fuerte pa su logro y na 1947, un total di  2147 ciudadanonan  Arubiano balente bou guia di Henny Eman sr, Shon A Eman y Aristide Wever a firma un peticion cu hunto cu un mocion a keda entrega na Su Mahestad y durante un reunion di  Mesa Rondo riba 18 di maart 1948 na Den Haag door di Shon A Eman. E deseo di e pueblo humilde pero determina a wordo scucha.

Pa celebra e dia special aki,  partido AVP a organisa diferente actividad caminda e seccion di hobennan a organisa un ‘car rally’ cu a cuminsa parti mainta bou di e nomber di ‘4 x 4 Adventure’  cu a pasa den diferente bario y parti di costa pa finalmente bin termina na cas di partido den oranan di atardi.

Na Cas di Partido a tuma luga e famoso dia di famia y amigo caminda  loke tin di haber cu cultura di Aruba – baile, musica y cuminda – yena di ambiente di un pueblo orguyoso a wordo presenta na bishitantenan cu a bin pa celebra cu partido AVP.

Un cantidad grandi di persona a duna acto di presencia y a pasa un dia ameno y contento  y cual celebracion a culmina te den oranan laat di atardi. Un danki ta bay na tur  hende cu a bin celebra e dia special aki y tambe na tur cu a duna un man pa e celebracion bira otro exito rotundo.