fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Aruba y islanan Hulandes na caminda pa sincronisa Ley di Procedimento Penal cu ta mehora e colaboracion

Den e siman cu a pasa, tabatin un reunion sumamente informativo den sala di Parlamento cu profesor Hans Den Doelder. El a bin cu parti di e ekipo cu ta trahando riba e Ley di Procedimento Penal nobo pa Aruba.

Parlamentario di fraccion di AVP Robert Candelaria ta considera e trabounan aki importante pa motibo cu aki ta trata un cambio legal pa Aruba, Corsow y Sint Maarten. Profesor Den Doelder y su ekipo di profesionalnan na Aruba, Corsou y Sint Maarten ta traha pa yega un ley penal cu lo mester wordo trata den e 3 Parlamentonan.

“Esaki ta algo cu sigur mi ta aplaudi, pa motibo cu mi ta convenci cu nos islanan mester colabora mas tanto cu ta posibel cu otro den combatimento di criminalidad. Ora cu nos leynan di Procedimento Penal,  cu ta regla kico un polis, un fiscal y hues comisario por haci y kico e no por haci den cuadro di su trabou ta mescos riba tur e islanan, e ta haci colaboracion entre instancianan hudicial hopi mas facil.”

Den tempo di campaña, segun Candelaria, el a splica cu Aruba mester haci hopi mas esfuerso pa traha hunto cu e otro islanan Hulandes pa combati criminalidad. Mescos cu den e mundo medico esaki a cuminsa tuma luga entre e islanan, “nos como paisnan ruman, mester inventarisa con cada pais por inverti den cierto specialismo p’asina cu menos placa nos por comparti experticio cu otro na bienestar di nos siguridad. Tambe mi ta kere cu esaki lo yuda engrandece e imparcialidad y profesionalismo di nos cadena hudicial ora nos traha mas cerca cu otro. Nos cuerponan por comparti trahado, conocemento y experticio hopi mas facil cu otro, ora nos base legal ta identico of casi identico.”

E Ley di Procedimento Penal ta e ley cu ta regla e cuadronan con pa haci investigacion, y tambe e ta stipula e derecho- y obligacionnan di tur cu tin un rol den investigacion. E proposicion di ley nobo aki ta den su fase final pa por wordo trata. A cuminsa traha riba dje na aña 2013. Awor despues di hopi deliberacion y preparacion e ta casi cla pa wordo trata den Parlamento di Aruba. Corsou y Sint Maarten tambe ta casi cla pa e ley por wordo trata.

E ley aki originalmente ta data di aña 1914 y e version nobo ta encera hopi cambio, compara cu e ultimo biaha cu a revisa e ley na aña 1997.

Algun ehempel ta cu: E victima ta haya un rol central den un investigacion; a drecha e procedura pa compensacion pa e victima ora ta necesario; instancianan por haci uzo di tecnologia moderno den caso di por ehempel interogacion y tambe a regla miho con pa haci uzo di DNA den investigacion; a tene cuenta cu cambionan den hurisprudencia Europeo cu ta conta pa nos tambe; e duracion di detencion y prolongacion di detencion a cambia teniendo cuenta cu situacion moderno; a agrega un rol adicional pa e PG y Hof den caso cu ta investiga un mandatario.

E proposicion di ley ta hopi amplio. Prome cu trata e ley “mi kier manda palabra di aprecio pa tur esnan cu a traha duro riba e ley aki. Awor pronto nos Parlamento lo mester studia y trata e ley p’asina nos instancianan den nos cadena hudicial tin instrumentonan legal nobo y amplio cu na mes momento ta salvaguardia e derechonan di nos ciudadanonan den investigacion pa nos tin un Aruba y awor hasta un region mas safe y mas sigur.”

Den Doelder ta un profesor emerito na universidad Erasmus na Rotterdam, y ta profesor di ley na Universidad di Corsou y  ta miembro suplente di Hof.