Un multitud enorme a yega na Club Don Bosco na Noord pa yama bon bini na e candidato nobo riba lista di partido AVP sra. Marisol Lopez-Tromp. Compaña pa su esposo, mayornan, amigo y sostenedornan e candidato fuerte a yega na unda lider di partido Mike Eman, candidatonan di partido AVP y un masa berde tabata warda riba dje. Club Don Bosco tabata rand rand di hende y pafo e otronan a sigui pa medio di speakernan kico tabata wordo bisa paden.
Marisol Lopez-Tromp a wordo introduci pa Benky Fowler. Despues maestro di ceremonia Rene Herde a introduci lider di partido Mike Eman kende bou aplauso grandi y gritonan di apoyo a bay dilanti y splica e cantidad enorme di hende presente escogencia di partido AVP pa Marisol Lopez-Tromp. Mike Eman tabata hopi cla. Un hende cu a para pa principio y no pa su cartera ta goza di un aprecio grandi. Na momento cu den Parlamento e ley di austerisacion a wordo presenta dor di partido AVP Marisol Lopez-Tromp mescos cu su colega Mervin Wyatt-Ras no a sucumbi pa ningun presion y aunke cu e ley aki lo a costa ambos como ex parlamentario y Marisol tambe como ex minister un suma grandi di placa, asina mes nan a scoge pa vota na fabor di e ley aki. Esaki a causa un disturbio grandi den nan partido cu a yega asina leu cu ambos, politiconan femenino fuerte, a wordo saca na mal ordo di nan partido. Tur hende cu ta sigui politica ta corda con ambos dama a wordo malogra dor di nan partido cu nan a sirbi pa añanan largo. Lider di AVP Mike Eman: “Hendenan asina un pais mester. Hendenan cu no ta pensa riba nan cartera, pero cu ta pone pueblo y pais na prome lugar. Hendenan cu ta traha segun principionan”.
Lider di AVP a sigui bisa tambe cu durante e deliberacionnan cu el a hiba cu e candidato nobo, e no tabatin ningun exigencia. Ni di number ni tampoco di puesto. Al contrario, sra.Marisol Lopez-Tromp a bisa cu number riba lista p’e no tin ningun prioridad. Su meta ta pa traha pa hiba pais Aruba dilanti. Un meta noble. E discursonan a yena esnan presente cu confiansa cu den Marisol Lopez-Tromp AVP a haya un excelente politico cu a demostra su balentia y di tin un acogida grandi den pueblo. Marisol a gradici tur presente pa e sosten grandi cu el a ricibi. Aunke e y partido AVP a yega di para den pasado linea recta contra otro, semper e respet pa otro tabata mutuo. E ta sinti su mas masha bon bini cerca partido AVP. Mama di Marisol sra. Yvonne Tromp a dirigi algun palabra na e publico grandi apoyando su yiu muhe den su escogencia. “Nos ta dune tur sosten cu e mester”. Na final Marisol hunto cu Mike Eman y e multitud grandi a cana bay Cas di Partido na Noord.
